Qırımda keçken künü 9 hasta koronavirus yuqunçından vefat etti, umumen pandemiya vaqtında 671 kişi vefat etti, dep haber ete Qırımnıñ Rusiye sağlıq nazirligi.
«3762 insan (COVID) ambulator tedaviylevde buluna, 2775 kişi (COVID ve pnevmoniya) hastahanelerde yata, observatorlarğa alınğan yoq. Umumen 30205 COVID-19 hastası qayd etildi. Tüzelgen 24282 insan çıqarıldı», – dep aytıla müessise haberinde.
Keçken künü Qırımda 251 koronavirus hastası qayd etildi. Qırım sağlıq naziri Aleksandr Ostapenkonıñ malümatına köre, 139 koronavirus hastasınıñ alı ağır.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
