Qırımda 62 koronavirus hastası ağır ve pek ağır alda buluna. Bu aqta Qırımnıñ Rusiye sağlıq naziri Aleksandr Ostapenko noyabrniñ 18-nde operativ ştab toplaşuvında bildirdi.
«62 hasta ağır ve pek ağır alda buluna, 28-i suniy avalandıruvda qala. Yedi hasta – invaziv aqcigerlerni suniy avalandıruvda, 21 hasta – invaziv olmağan suniy avalandıruvda», – dedi Ostapenko.
Keçken künü Qırımda 211 koronavirus hastası qayd etildi, 12733 COVID-19 hastası qayd etildi, 8275 tüzelgen soñ hastahaneden çıqarıldı, 222 hasta vefat etti.
Rospotrebnadzor, yañı koronavirus hastalarınıñ sayısı dekabrniñ ortasında pek artacaq, dep bekley.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
