Rusiye kontrolindeki Qırım yolbaşçısı Sergey Aksenovnıñ bildirgenine köre, Qırımda keçken künü 225 yañı koronavirus hastası qayd etildi.
«Noyabrniñ 20-nde Qırım Cumhuriyetinde 225 koronavirus hastası qayd etildi, 59-ınıñ hastalıq alâmetleri yoq. 180-i tibbiy yardım içün muracaat etkende qayd etildi, 45-i daa evel qayd etilgen hastalarnen alâqada oldı», – dep yazdı Aksenov Facebook saifesinde.
Hatırlatamız, noyabrniñ 19-nda berilgen malümatqa köre, Qırımda bir künde 6 hasta koronavirus yuqunçından vefat etti.
Rospotrebnadzor, yarımadada COVID-19 hastalarınıñ sayısı dekabrniñ ortasında pek artacaq dep bekleyler, dep qayd etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
