Keçken künü Qırımda 214 yañı koronavirus hastası qayd etildi, olarnıñ arasında 46-nıñ hastalıq alâmetleri yoq edi. Bu aqta Qırımnıñ Rusiye başı Sergey Aksönov bildirdi.
"116 hasta tibbiy yardım içün muracaat etkende qayd etildi, 95 daa evel qayd etilgen hastalarnen alâqada oldı, 3 hasta çetelden keldi", – dep yazdı Aksönov Facebook saifesinde.
Berilgen malümtaqa köre, keçken künü yañı koronavirus yuqunçı tedqiqlerini yapqan Qırım laboratoriyaları 5448 adamnı teşkergen. Bütün vaqıt içinde 8673 kişi tedaviylengen.
Qırımnıñ Rusiye Sağlıq Saqlav nazirliginiñ soñki malümatına köre 222 adam ölgen. Aqyar şeerinde yılnıñ başından 3636 adam yañı koronavirus yuqunçına oğrağan, 2915 tedaviylengen, 99 ölgen.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, yarımadada yañı koronavirus hastalarınıñ sayısı dekabrniñ ortasında artacaq dep beklenile.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı
