Qırımda Ermeni Bazar-Canköy-Kefe-Keriç yolunda "VAZ" maşnası ve traktor çatıştı - yengil maşnanıñ aydavcısı elâk oldı. Bunı Rusiye FVN-niñ Qırım idaresiniñ matbuat hızmeti bildirdi.
Beyanatqa köre, yol qazası oktâbr 22-sinde oldı: traktor qarşı yolaqqa çıqıp, maşnanen çatıştı. "VAZ"nı 21 yaşındaki yigit ayday edi.
"Qaza neticesinde "VAZ" avtomobiliniñ aydavcısı ağır yaralanıp, elâk oldı, yolcusı ise çeşit-türlü seviyedeki travmalarğa oğradı. Qaza yerine Devlet avtomobil teftişi (DAT) taqımı ketti", - denile beyanatta.
Rusiye polisi qaza sebebinden teşkerüv keçire ve onıñ neticesinde bir usul qararı berilecek.
Oktâbr 19-ında Aqmescitte Mitsubishi maşnasınıñ aydavcısı eki piyadeni urdı.
Bundan evel Aqmescitte Lada maşnasınıñ aydavcısı, yolnı üçfenersiz cayav keçitinden keçken mektep talebesini urdı.
Qurtarıcılar Qırımda ciddiy yol qazalarınıñ sayısı arttı, dep bildirgen edi. Qırımda 2019 senesiniñ ilk üç ayında keçken senege baqqanda bir buçuq qat ziyade aydavcı mesüliyetke çekildi.
