Qırımda ğıyabiy şekilde mahkemelengen Refat Çubarovnıñ ükmü iyunniñ 1-nde ilân etilecek, Qırımnıñ Yuqarı Mahkemesine atfı etip bildireler haber vastaları. Çubarov, Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv) binaen qabaatlana.
«Üküm iyunniñ 1-nde saat 10-nda ilân etilecek», – dedi mahkeme hadimi TASS agentligine.
«Qırım esnası» da bunı haber ete: «Mahkeme mesleatlaşuv odasına ketti, üküm iyunniñ 1-nde ilân etilecek. Al-azırda mahkeme munaqaşalarında mudfaa taarfı çıqışta duluna».
Çubarovnıñ tayin etilgen advokatı Aleksandr Osokin mayısnıñ 24-nde mahkeme oturışında, Çubarovnıñ iştiragi aqqında doğrudan doğru iddialar tek beş şaattan oldı, amma ileride mudafaa tarafınıñ on şaatı tarafından red etildi, dep qayd etti.
Bu sebepten mudafaa tarafı qabaatsız dep tanımaqnı talap ete.
Mayısnıñ 24-nde Rusiye nezaretinde olğan Qırım Yuqarı mahkemesinde, yarımadada ğayabiy şekilde mahkemelengen Refat Çuburovnıñ davası boyunca olıp keçken mahkeme oturuşında qabaatlav tarafı Çubarov içün 9 yıl apis ceasını istedi.
Qırımtatar Milliy Meclis reisi Refat Çubarov Qırım.Aqiqatqa qabaatlav tarafı oña 9 yıl apis ceasını istemesini tefsir etti.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Bıltır iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
