Bıltır Qırım yalısı yanında zapt etilgen "Nikopol" ukrain kateri, Oçakov limanına (Mıkolayiv vilâyeti) keldi. Bunı, yerli sakinlerge atıf etip, Qırım.Aqiqat mühbiri bildire.
"Nikopol"niñ kelmesi aqqında Ukraina Arbiy-deñiz quvetleri de haber ete.
"Yañı Qapu" buksiri ise, Oçakov limanınıñ yalısı yanında buluna, dep bildire Qırım.Aqiqat mühbiri.
Daa evel "Ğaydamaka", "Sapfir" ve "Titan" ukrain gemileri, FSB zapt etken "Berdânsk", "Nikopol" ve "Yañı Qapu" gemilerini alıp, Oçakov limanına (Mıkolayiv vilâyeti) yaqınlaşqanı bildirile edi.
Daa evel Ukraina Silâlı quvetleri Arbiy-deñiz quvetleriniñ komandanı İgor Voronçenko, çarşenbe-cumaaqşamı künleri kelmesi beklenile, dep bildirgen edi.
Bazarertesi künü, noyabrniñ 18-nde, bir yıl evelsi Qara deñizde Keriç boğazı yanında zapt etilgen «Nikopol», «Berdânsk» ukrain katerleri ve «Yañı Qapu» buksiriniñ Rusiye tarafından qaytarıluv esnası başlatıldı, dep bildirdi Ukraina Arbiy-deñiz quvetleriniñ komandanlığı. Bundan evel ukrain gemileriniñ Ukrainağa qaytarılması aqqında Rusiye Tış işler nazirligi bildirgen edi.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, berilgen malümatqa köre, üç Ukraina arbiy gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Ukraina deñizcileriniñ 6 yılğa qadar azatlıqtan marum qalması mümkün edi.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
