İlhaq etilgen Qırım yalısı yanında Rusiye Qara deñiz flotunıñ gemileri ekipajları, K-2 kurs vazifesiniñ tapşırıp, raketa ve artilleriya atuvlarnı keçirdi. Bu aqta rusiye flotunıñ matbuat hızmeti bildirmekte.
“Ögrenüv merasimleriniñ devamında “Suzdalets” ve “Valentin Pikul” gemileri, suvüstü ve ava nişanlarına attı”, - denile beyanatta.
Bundan ğayrı gemiler, yaldavuq mina maketine de attı. “Samum” raketalı geminiñ ekipajı, paraşütnen avağa tüşürilgen nişanğa zenit ve artilleriya atuvlarnı yaptı.
Daa evel Qırım ve Novorossiysk Rusiye arbiy deñiz bazalarınıñ gemi ekipajları, Qara deñizde raketa ve artilleriya atuvlarnı keçirgeni bildirile edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
2014 senesi Qırım işğalinden soñ, Rusiye yarımadada arbiy ögrenüvlerni muntazam tarzda keçire. Ukraina Baş ştabında, rusiye arbiyleriniñ Qırımdaki areketleri qanunlarğa qarşı kele dep aytalar.
