Qırımtatar Milliy Meclisiniñ reisi Refat Çubarovnıñ bildirgenine köre, işğal etilgen Qırımğa taba yürüş keçirilüvini belgilegen «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyasını azırlaycaq ve keçirecek ştabnıñ ilk erkânı yanvarniñ 27-nde şekillendi.
«Toplaşuvda iştirakçiler keçirilüvi planlaştırılğan barışıq aktsiyasınen bağlı ilk tedbirlerni muzakere etip, olarnı yerine ketirgeninden mesüliyetli olğan insanlarnı belgiledi, tezden aydınlatılacaq ştab strukturası ve ilk erkânını muzakere ettiler. Aynı vaqıtta, ştab erkânı yañı insanlarnıñ qoşulmasınen kenişletilecek, dep añlaşqanlar», – dep yazdı Çubarov Facebookta.
Onıñ qayd etkenine köre, toplaşuv iştirakçileri, bu aktsiyanıñ iştirakçileri Herson vilâyeti ve işğal etilgen Qırımnıñ memuriy sıñırından 2020 senesi mayısnıñ 3-nde keçecek, dep qarar aldı.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Refat Çubarovnıñ aytqanına köre, yürüş teşkilâtçıları yapqan areketlerini Ukraina akimiyetinen keliştirmege «tırışacaq».
Yanvarniñ 22-nde Çubarov Qırım yürüşi mayısnıñ 2-nde keçirilecek, dep ayttı. Meclis reisi, işğal altındaki yarımadağa küç qullanıp kireceklerini de inkâr etmey.
Ukraina Devlet sıñır hızmetiniñ bildirgenine köre, keçirilüvi mayısnıñ 2-ne ilân etilgen Qırım yürüşiniñ iştirakçilerine mania olmaq içün sebep yoq.
Rusiye kontrolindeki Qırım yolbaşçısı Sergey Aksenov ilân etilgen yürüşni provokatsiya dep adlandırıp, «sert qarşılıq kösterilecegini» vade etti.
