Rusiye kontrolindeki Qırım yolbaşçısı Sergey Aksenov Qırımtatar Milliy Meclisiniñ reisi Refat Çubarovnıñ keçirilmesi mayısnıñ 2-ne ilân etilgen Qırım yarımadasına taba yürüş aqqında malümatını provokatsiya dep adlandırdı.
Aksenovnıñ aytqanına köre, bu tedbirniñ iştirakçilerini «sert qarşılıq» bekley.
«Sıñırdan qanunsız keçüv areketleri, Rusiyege kirüv ıntıluvları olsa, böyle areketler, şübhesiz, sert ve qanunğa köre qarşılıq alacaq. Ukraina aikmiyeti provokatsiyanıñ aqibetlerini tüşünmeli», – dep yazdı Aksenov Facebookta.
İşğal etilgen Qırımnıñ sabıq prokurorı, Rusiye Devlet dumasınıñ deputatı Natalya Poklonskaya da Çubarovnıñ ilânına seslendi, o, yürüş iştirakçileri Qırımğa qadar kelip olamaycağından emin.
Çubarov, «5 kanal» Ukraina telekanalına izaat berip, mayısnıñ 2-nde qırımtatarlar Qırımnıñ memuriy sıñırından «Çonğar» keçiş noqtasından kütleviy şekilde keçmege planlaştıra, dep bildirdi. Meclis reisiniñ qayd etkenine köre, birinci sıralarda Meclis azaları, halq deputatlar, ğarbiy ortaqlar ketecek. Çubarov, işğal altındaki yarımadağa küç qullanıp kire bileceklerini inkâr etmey.
2019 senesi dekabrniñ 6-nda Çubarov esas Ukrainadan Rusiye işğal etken Qırımğa taba yürüş keçirilecek ve azırlıq başladı, dep ilân etti. Çubarovnıñ bildirgenine köre, belli mesleatlardan soñ erkânı aydınlatılacaq ştab endi quruldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
