Qırım ve Rusiye Tataristanınıñ bala aqları vekâletlileri Qazandan raatlanmağa kelgen 49 bala zeerlengen Kezlev civarındaki «Luçistıy» lagerine yol aldı. Bu aqta Qırımnıñ bala ombudsmeni İrina Klüyeva TASS Rusiye haber agentligine bildirdi.
«Şimdi yolğa çıqam, Kezlevge. Qazanlı zenaatdaşım endi anda», – dedi o.
Tataristan prezidenti matbuat hızmetiniñ reber muavini Liliya Galimovanıñ agentlikke bildirgenine köre, region yolbaşçısı Rustam Minnihanov Kezlevge cumhuriyetniñ bala aqları vekâletlisi Güzel Udaçinanı Kezlevge yolladı.
«Tataristan Cumhuriyetiniñ prezidenti meseleni kontrol altına aldı, bütün hızmetlerimiz qırımlı zenaatdaşlarnen bağda. Hastahanege alınğan balalarnıñ alı stabil, ayatiy telükesi yoq», – dedi Galimova.
İyülniñ 16-nda Kezlev civarındaki Yalı Moynaq (Zaozernoye) köyüniñ bala lagerinde kütleviy zeerlenüv oldı. Müessise müdiri kün devamında aman-aman 40 bala alını ekimlerge şikâyet etti, dep tasdıqladı. Daa soñra zeerlengenlerniñ sayısı 40-tan çoq oldı, dep bildirildi. Balalar Qırımğa Qazandan raatlanmağa keldi, yaşları – yediden 17-ge qadar.
Qırımdaki Rusiye Tahqiqat komiteti kütleviy zeerlenüvni teşkerip başladı.
Rospotrebnadzor lagerde dezinfektsiya yapılğanını bildirdi. Qırımdaki Rusiye Tahqiqat komiteti balalarnıñ zeerlenüvi sebebinden cinaiy davalar açılğanını aydınlattı.
2018 senesi iyün ayında Aqyarnıñ «Laspi» bala lagerinde balalar kütleviy şekilde zeerlengen edi. Rospotrebnadzor aş blokunda sanitar-epidemiologik rejiminiñ «büyük hatalarını» qayd etken edi. Lager şeerniñ fevqulâde vaziyetlerni ögüni aluv ve yoq etüv komissiyasınıñ qararı ile vaqtında qapatılğan edi.
