Kezlev civarındaki «Luçistıy» bala lagerinde iyülniñ 16-nda 40-tan ziyade kişi zeerlendi, dep bildire Rusiye ve Qırım kütleviy haber vastaları. Bu malümatnı yerli akimiyet ve lager reberligi tasdıqlay.
Bala müessisesiniñ müdiri Renat Kayumovnıñ İnterfaks Rusiye agentligine bildirgenine köre, kün devamında 40-qa yaqın bala ekimlerge alını şikâyet etti. «Hastahanege barıp, keri ketire edik», – dep ayttı o, neşirge. Onıñ qayd etkenine köre, balalarnıñ alâmetleri «oşay, amma aynı degil».
Onıñ malümatına köre, balalar Qırımğa Qazandan raatlanmağa keldi, yaşları – yediden 17-ge qadar.
Ekimlerniñ TASS agentligine bildirgenine köre, balalarnıñ «ayatiy telükesi yoq», amma lagerden hastahanege zeerlenüv alâmetlerinen kelmege devam eteler. Olarnı eki infektsion bölükke yatqızalar. Kezlevniñ Rusiye memuriyeti, hastahanege alınğan bala ve büyüklerniñ sayısı 40-tan ziyade oldı, dep qayd ete.
«40-tan ziyade insan hastahanege alındı, yengil ve orta allarda. Em balalar, em büyükler bar – yetekçiler», – dep bildirdi şeer memuriyeti TASS agentligine.
Haber etilgenine köre, anda Rospotrebnadzor hadimleri çalışa.
Al-azırda diger menbalar bunıñ aqqında haber etmey. Qırımnıñ Rusiye akimiyeti vaziyetni şimdilik izaatlamadı.
Bu sene mart ayında Yalta şifahanesinde kütleviy zeerlenüv olğan edi.
2018 senesi iyün ayında Aqyarnıñ «Laspi» bala lagerinde balalar kütleviy şekilde zeerlengen edi. Rospotrebnadzor aş blokunda sanitar-epidemiologik rejiminiñ «büyük hatalarını» qayd etken edi. Lager şeerniñ fevqulâde vaziyetlerni ögüni aluv ve yoq etüv komissiyasınıñ qararı ile vaqtında qapatılğan edi.
Aqyar mahkemesi «Laspi» agerini zeerlengen balağa tazminat ödemege mecbur etti.
