İşğal etilgen Qırımdan ya da işğal etilgen Donetsk ve Lugansk vilâyetleriniñ rayonlarından esas Ukrainağa kelgen vatandaşlar observatorlarğa mecburen yollanılacaq.
Bu aqta Ukraina Nazirler şurasınıñ saytında derc etilgen qararda aytıla.
Vesiqağa köre, COVID-19 hastasınen alâqada oluv şübhesi olmasa, observatsiyağa tek Qızıl Haç Halqara komitetiniñ missiya hadimleri, Ukrainada akkreditatsiya olğan diplomatik missiyalar, hususan vaziyetniñ monitoringini kerçekleştirgen ve vaqtınca işğal etilgen topraqta yaşağan ealige gumanitar yardım alıp ketkenler yollanılmaycaq.
Observatsiya müddeti – 14 kündir.
Vaqtınca işğal etilgen topraqlarnıñ reintegratsiya meseleleri nazirliginiñ martnıñ 17-nde bildirgenine köre, Qırım ve Herson vilâyetiniñ memuriy sıñırındaki keçiş noqtalarından keçüv aprelniñ 3-ne qadar sıñırlandı.
Rusiye FSBsiniñ sıñır idaresi martnıñ 18-i saat 00-dan itibaren esas Ukrainadan Qırımğa «çetel vatandaşlarını» almay.
Aprelniñ 3-nde işğal etilgen Qırımda çetelden kelgen 2998 insan tibbiy közetüv altında buluna, olardan 2915-i evde dinamik közetüvde, 68-i hastahanede, 15-i observatorlarda buluna. Rospotrebnadzor malümatına köre, cuma kününe qadar 18 COVID-19 hastası qayd etildi. Aqyarda – 5 koronavirus hastası.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
