Aqmescitteki Cuma Cami açılışı kelecek senege qaldırıla bile. Bu aqta Rusiye kontrolindeki Qırım müftisiniñ muavini Esadullah Bairov matbuat konferentsiyasında bildirdi.
«Yeterli maliye olsa ve kerekli ustazlarnı celp etmek içün sıñırlavlar olmasa, beş aylıq iş qaldı. Amma kerekli rejimde ne vaqıt çalışıp başlarmız, er bir usta işke başlamaq içün ondan evelki ustaznı bekley… Bir-birine bağlı iş kete, bir ustaz olmasa, sozula. Eñ yahşı tahminlerge köre, bu işke altı aydan az vaqıt kerek», – dedi o.
Buña baqmadan, Bairov cami ancaq 2022 senesi açıla bile, dep ayttı.
«Razım, bir müddet belgilemege, em de pandemiya vaqtında, mümkün degil. Daa bir yılımız bar, bu yıl camini bitirip, anda dua etermiz, dep aytmaq büyük laf olmaycaqtır. Buña tırışamız, bu aqta aytamız. Allahnıñ işi. Caminiñ 2021 senesi açılmasını istemese, onı 2022 senesi açarmız», – dedi Bairov.
Bundan evel Qırım müftisiniñ muavini Esadullah Bairov qurucılıqnı 2021 senesiniñ soñunda bitirmege planlaştıralar, dep bildirdi.
Rusiye akimiyeti Aqmescitteki yañı Cuma Camini 2019 senesi aprelniñ 21-nde açmağa planlaştırğan edi – Rusiye prezidentiniñ Qırımnıñ sürgün etilgen halqlarnıñ reabilitatsiya buyruğını imzalamasınıñ beşinci yılında. Daa soñra yañı kün aytıldı – 2020 senesi aprelniñ 21-i.
Leyhağa köre, Aqmescitteki Cuma Cami 5,7 biñ metr kârelik olıp, 2,6 biñ insannı sığdıracaq. İnşaat eki qısımdan ibaret – qubbeli esas bina ve kolonnalı ve abdesthaneli iç azbar. Cami qurucılığı 2016 senesi oktâbr ayında başladı, onı 2019 senesiniñ soñunda bitirmege planlaştırıla.
