Qarasuvbazardaki «Taygan» arslanlar parkı ve Yaltadaki «Skazka» ayvanat bağçasınıñ saibi, qırımlı iş adamı Oleg Zubkov, Rusiye prezidenti Vladimir Putinge yazğan mektübini derc etti. İş adamı, Rusiye kontrolindeki Qırım yolbaşçısı Sergey Aksenovdan şikâyetçidir.
«Siz, sayğılı Vladimir Vladimiroviç, Qırım siziñ olğanını tüşünesiñizmi?! Yoq, siziñ degil, siz Qırım içün yalıñız para çuvalı olasıñız ve Qırımğa 600 milliard rubleden çoq endi sarf ettiñiz ve, eminim, yaqın yıllarda daa o qadarını masraf eteceksiñiz. Qırım bizim olğanını tüşünesiñiz, belki?! Yoq, ne yazıq ki, sayğılı Vladimir Vladimiroviç, Qırım bizim de degil. Qırımlılarnı Rusiyeniñ (Rusiye işğal etken – QA) Qırımında aşalaylar, biznesni qapatıp, Qırımdan ketmege mecbur eteler. Tek men olğanımnı tüşünmeñiz, menim kibi yüzlernen ve biñlernen iş adamı bar», – dep yazdı Zubkov.
Onıñ aytqanına köre, Qırım «Aksenovğa ve soy-soplarına ait». Zubkov, Putinni Aksenovnı «Moskvağa, Kremlge yanına almasına» çağırdı.
Kreml ve muracaatta qayd etilgen Aksenovnıñ cevabı daa yoq.
2019 senesi dekabrniñ 24-nde Aksenov Zubkovnı «temiz Ukraina tarafdarı» dep adlandırdı. Qırımnıñ Rusiye yolbaşçısı, Zubkov «parkları etrafında olğan problemlerni çezmege istemeyip, qavğa çıqara», dep bildirdi.
2019 senesi dekabr ayında Rusiye kontrolindeki Qarasuvbazar rayon mahkemesi «Taygan» arslanlar parkınıñ faaliyetini toqtattı. Rusiye mahkeme vekilleri Qırımda parklarnı müürledi, dep bildirdi Zubkov Qırım.Aqiqatqa.
2014 senesi Rusiyeniñ yarımada ilhaqına qoltutqan qırımlı iş adamı Oleg Zubkovnıñ Qırımnıñ Rusiye akimiyetinen zıddiyeti bar. Oleg Zubkov, mal-mülki bulunğan topraq damartılarınıñ vesiqalarını beş yıldan berli resmiyleştirip olamay, dep bildire.
Qırım işğali devamında Zubkov Kreml kontrolindeki Qırım akimiyeti tarafından oña nisbeten para cezaları ve qabaatlavlarnen bağlı tahminen 500 mahkeme oturışuvına bardı.
