Rusiye vekilleri, Rusiye kontrolindeki Qarasuvbazar rayon mahkemesiniñ qararını yerine ketirip, «Taygan» arslanlar parkını 30 künge qapattı.
Bu aqta park saibi, qırımlı iş adamı Oleg Zubkov dekabrniñ 5-nde Qırım.Aqiqatqa bildirdi.
«Qarar birden işke tüşürildi. Daa parkqa kelmedim, vekiller qaru, kassa, kirişlerni endi müürledi. Er şey qapalı», – dedi Zubkov.
Dekabrniñ 5-nde Rusiye kontrolindeki Qarasuvbazar rayon mahkemesi «Taygan» arslanlar parkınıñ faaliyetini 30 künge toqtattı.
Noyabrniñ 14-nde Zubkov, mahkeme park işini toqtatsa, 30 ayuvnı öldürmege mecbur olacaq, dep bildirdi.
Qırımnıñ Rusiye tabiat nazirligi, Zubkovnı ayuvlarnıñ «atıp öldürilmesi ya da evtanaziyası» lafları sebebinden qanunlar bozulmaycaq, dep tenbiledi.
Kreml kontrolindeki Yalta mahkemesi noyabrniñ 21-nde Oleg Zubkovdan ayvanlarnı musadere etüv davasını baqmağa başladı.
2014 senesi Rusiyeniñ yarımada ilhaqına qoltutqan qırımlı iş adamı Oleg Zubkovnıñ Qırımnıñ Rusiye akimiyetinen zıddiyeti bar. Oleg Zubkov, mal-mülki bulunğan topraq damartılarınıñ vesiqalarını beş yıldan berli resmiyleştirip olamay, dep bildire.
Qırım işğali devamında Zubkov Kreml kontrolindeki Qırım akimiyeti tarafından oña nisbeten para cezaları ve qabaatlavlarnen bağlı tahminen 500 mahkeme oturışuvına bardı.
