Tevqif etilgen faal Oleg Prihodkoğa, soyları Aqmescit SİZOsına yollağan ilâclarnı bermeyler.
Bunı Qırım.Aqiqatqa tefsir bererek, Prihodkonıñ advokatı Nazim Şeihmambetov haber etti.
"Bugün Aqmescit SİZOsında Oleg Prihodkonen körüşip oldım. Sıfatı bir coruq, sağlıq şikâyetleri yoq. Onı alâ daa karantin kamerasında tutalar, amma onıñ malümatına köre, yaqın vaqıtta umumiy blokqa avuştıracaqlar. Qorantasınıñ erzaq yollamasını aldı. Oleg Arkadyeviçniñ bir qaç aşqazan ve urologiya hastalığı bar, ve soyları bazarertesi künü oña ilâc ve közlükni yolladı. Amma ilâclarnı oña bermediler, sebepler de belli degil. Sebeplerini SİZO idaresinde ve tibbiy hızmette bilmege tırışacağım", - dedi advokat.
Onıñ aytqanına köre, Prihodko ilâclarını almasa, imaye SİZO başlığınıñ böyle areketlerine şikâyet yollaycaq.
"Men, onıñ tutuluvı cemiyette çoq muzakere etile, dep Oleg Prihodkoga aytıp berdim. Oña qol qutqan er keske minnetdarlığını bildirdi. Onı qabaatlağan şeylerden uzaq olğanını daa bir kere tekrarladı. O sadece öz fikrini ifade ete edi ve Ukraina vatanperveri olıp qala. Ayrıca qırımtatar halqınıñ maneviy ve psihologik destegi içün teşekkür etti", - qoştı Şeihmambetov.
Prihodkonıñ tutulğanını oktâbrniñ 10-nda saba kezlevli ukrain faali, yedinci çağırılış Ukraina halq deputatı Eduard Leonov haber etti. Faalniñ ömür arqadaşı Lübov Prihodko da tutulğan edi.
FSB hadimleri Rusiye Ceza kodeksiniñ 223.1 (patlayıcı maddelerni qanunsız azırlanması) ve 205 (terror ücümi) maddelerine istinaden qabaatlay.
2019 senesi fevralniñ 8-nde Qırımdaki FSB idaresiniñ hadimleri Saq rayonınıñ Orehovo köyünde Oleg Prihodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler. Rusiye quvetçileri Prihodkonıñ evinde keçirilgen tintüvni izaatlamadı. 2016 senesi iyün ayında Rusiye quvetçileri faalni maşinasındaki ukrain nomeraları içün tutqan edi.
