Aqmescit SİZO-sında «Hizb ut-Tahrir davası» mabüsi Timur Yalkabovnıñ astması ağırlaşqan ve onı mahsus blokqa avuştırğanlar. Bunı «Qırım birdemligi» cemaat birleşmesine Yalkabovnıñ apayı Aliye Mujdabayeva haber etti.
Tahqiqat tevqifhanesiniñ territoriyasında Timur Yalkabov ile qısqa körüşüv içün tahqiqatçınıñ razalığını alıp olğan. Müessise müdiriyeti olarnıñ körüşüvine maniya olmağan.
«SİZO-da eski hastalığı ağırlaştı, astma tutuvı başlandı ve eki kün evel onı mahsus blokqa avuştırdılar. Onıñ sürekli astması bar. Resmiy olaraq üçünci gruppa saqtı bar edi, bir yılğa berilgen edi. Soñra biz onı uzatmadıq, çünki tevqif etilmezden evel Timur oña yardım etken bir ilâc içken edi. Şimdi kene bunen şekişip başladı, amma SİZO-da saqatlıqnı nasıl devam etmekni bilmeymiz», – dedi apayı.
Onıñ sözlerine köre, mahsus blokta oña eki qatlı yataqnıñ ekinci qatında yer bergenler. Bundan sağlıq ala daa beter olğan.
«Tavan külden qap-qara, şunıñ içün nefesi tutula. Ekim kelip, ayatqa çıqarğan. Nefes alğan soñ kene kamerağa kirsetkenler. Müdirge barıp, onı diger kamerağa avuştırmalarını istedim. Bundan evel olğan kamerada, iç olmağanda bundan biraz yahşıca şarait edi. Mında ise asla şarait yoq, divar ve tavan sılaq. O anda nefes alıp olamay», – dep ayttı mabüsniñ apayı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Qırım Muhtar Cumhuriyeti ve Aqyar prokuraturası fevralniñ 17-nde Qırımda keçirilgen kütleviy tintüvler sebebinden cinaiy tahqiqat başlatıldı, dep bildirdi.
Ukraina prezidentiniñ Qırım Muhtar Cumhuriyetindeki daimiy temsilciligi Rusiye quvetçileriniñ Qırımda musulmanlarnıñ (ekseriyeti qırımtatarı ola) evlerinde keçirgen tintüvleri aqqında malümat Ukraina uquq qoruyıcılarına berile ve «milliy ve halqara seviyedeki işte» qullanılacaq, dep bildire.
Ukraina Tış işler nazirligi Rusiye quvetçileriniñ fevralniñ 17-nde işğal etilgen Qırımda keçirgen tintüv ve tutuvlarğa qarşı narazılıq bildirdi. Müessise, halqara institutlarnı bu areketlerge qıymet kesmege çağırıp, soñki tutuv ve tintüvler aqqında malümatnı BM Baş Assambleyasınıñ sessiya baqıluvına çıqarmağa planlaştıra.
Ukraina Reintegratsiya nazirligi halqara toplulıqnı Qırımdaki tutuvlarğa cevap bermesine çağırdı.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
