Rusiyeniñ nezareti astında olğan Qırım Yuqarı mahkemesi yanvarniñ soñunda "Ukrayina ile alâqalarda" qabaatlanıp yaqalanğan "Qırım mülmanları davası"nıñ altı mabüsini tevqifli qaldırdı. Bunı mahkemeniñ matbuat hızmeti haber etti.
"Qırım Cumhuriyeti Yuqarı mahkemeniñ istinaf qararı ile qabaatlı şahıslarğa tayin etilgen sıñırlama tedbiri deñişmez qalacaq, istinaf şikâyetleri ise qanaatlendirilmeycek. Mahkeme oturışı qapalı şekilde keçirildi", - dep yazıla bildirmede.
Yanvarniñ 24-nde saba işğal etilgen Qırımnıñ Canköy şeeri ve rayonında Rusiye quvetçileri qırımtatarlarnıñ evlerinde tintüv keçirdi: Nemse Canköy köyünde (Blijnegorodskoye) Ekrem Kroşnıñ, Timofeyevka köyünde Ayder Asanov ve Refat Seydametovnıñ, Çoqraqlı Şeyh Eli (Dneprovka) Osman Abdurazakovnıñ, Canköyde Löman Zekiryayev ve Halil Mambetovnıñ evlerinde.
Ekrem Kroşnıñ ömür arqadaşı Amideniñ «Qırım birdemligi» cemaat birleşmesine bildirgenine köre, Qırımnıñ şimalinde tutulğan qırımtatarlar «terrorizmde» qabaatlana bile. Mustaqil advokatlarğa qırımlı musulmanlarnıñ yanına keçmege izin berilmedi.
Daa soñra belli olğanına köre, yanvarniñ 24-nde saba Canköyde ve Canköy rayonında tutulğanlar terror teşkilâtını teşkil etüv ve faaliyetinde iştirak etüv ile qabaatlanalar (RF Ceza qanunnamesiniñ 205,5 maddesi – QA). Laf Rusiyede yasaqlanğan «Hizb ut-Tahrir» teşkilâtı aqqında kete.
Qırımnıñ işğal yolbaşçısı Sergey Aksönov qırımtatarlarnıñ evlerinde keçirilgen tintüvlerni izaatlap, quvetçiler «Ukrayina ile alâqalarda» qabaatlanğan altı kişini yaqalağanını bildirdi.
Ukrayina prezidentiniñ Qırım Muhtar Cumhuriyetindeki daimiy temsilciligi Qırımnıñ şimalinde Ukrayina vatandaşlarınıñ tutuluvını takbih etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
