Qırımda Aq Manay boynunda Rusiye arbiyleri tanklarğa qarşı istihkam hattını Qara deñizge qadar uzatalar. Bunı Qırım.Aqiqat mühbiri haber etti.
Bu istihkam hattı, Keriç yarımadasını Qırımnıñ esas qısmı ile bağlağan tar bir boyun üzerinde yerleşe.
Qırım.Aqiqat mühbiriniñ evel haber etkeni kibi, Aq-Monaydaki "ajderha tişleri" hattı "Tavrida" şossesiniñ yanaşasında yerleşip, Azaq deñizi yönelişinde ufuqta yoq ola edi. Amma şimdi istihkam hattı trassanıñ diger tarafında Qara deñiz saili yönelişinde qurula.
Qırım.Aqiqat mühbiriniñ bildirgenine köre, beton pilâkileri Batalnoye ve Primorskoye köyleri arasında üç sıra alında töşele. Yaqınlarda qurucılıq işlerinden soñra qalğan topraq kötermelerini körmek mümkün.
Evel Qırımnıñ Rusiye yolbaşçısı Sergey Aksönov Ukrayina istihkam şekillendirüvi sayesinde yarımadanı işğalden qurtarıp olamaz, dep bildirgen edi.
Fevralniñ 24-nde Ukrayina prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayina prezidenti ofisiniñ yolbaşçı muavini İgor Jovkva Qırım.Aqiqatqa intervyü berip, Ukrayinanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kıyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayinanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayina arbiy istihbarat yolbaşçısı Kırılo Budanov Ukrayina Qırımnı em küç, em diplomatiyanen keri alacaq, dep bildirdi.
Ukrayina Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
