Qırımnıñ Rusiye yolbaşçısı Sergey Aksenov Ukrayına fortifikatsiya ve mudafaa şekillendirüvi sayesinde yarımadanı işğalden qurtarıp olamaz, dep bildire. Bu aqta TASS haber ete.
«Olar prezidentniñ (Kreml yolbaşçısı Vladimir Putinniñ – QA) emrinen kerçekleştirilgen tedbirler sayesinde Qırımnı bir şekilde almağa imkânları olmağanını añlaylar», – dep ayttı Rusiye memurı.
Onıñ aytqanına köre, «Qırımda bu ceetten bir telüke yoq ve qırımlılar raat yuqlay bile». Aksenov Kyivge berilgen ğarbiy uçucısızlar yardımınen yarımada mudafaasını «teşkermege» tırışalar. «Tedbirler 100% alındı, ve olarnıñ yerine ketirilüvi ola bilecek zararnı mümkün olğanı qadar eksiltmege imkân berecek», – dep qoştı Aksenov.
Fevralniñ 24-nde Ukrayına prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayına prezidenti ofisiniñ yolbaşçı muavini İgor Jovkva Qırım.Aqiqatqa intervyü berip, Ukrayınanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayınanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayına arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirdi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
