Qırım MC ve Aqyar şeeri prokuraturası, evel Rusiye quvetçileri tarafından Zello internet-ratsiyası vastasınen ekstremist aytılmalar yapqanınen qabaatlanğan Qırım sakini İsmail Ramazanovnıñ cinayet taqibinde işirak etken qadığa qarşı mahkemege qabaatlav aktını yolladı.
QMC Prokuraturasınıñ matbuat hızmetiniñ haber etkenine köre, qadı devlet hainliignen qbaatlana.
Mahkemeden evel keçirilgen tahqiqat, Qırım MC Aqmescit rayon mahkemesiniñ sabıq qadısı, 2014 senesi yarımadanıñ işğal etilmesinden soñ antına hainlik etip, işğalciler qanunsız teşkil etken mahkeme organlarına işke kirgenini belgiledi.
«Qabaatlanğan, Rusiye qanunlarına köre areket etip, Ukraina suvereniteti ve topraq bütünligine zarar bergen faalitte çetel memleketke yardım etip yarımadaad qanunsız sürette çalıştı. Aynı zamanda qabaatlanğan ukrain faalerinden biriniñ cinayet taqibinde iştirak etti. Qadı qanunsız sürette faalniñ tevqif müddetini uzattı. Maddege köre o, 12-15 yıl apis cezasına mahküm etile bile», – dep yazıla bildirmede.
İsmail Ramazanovğa qarşı dava yanvarniñ 16-nda qapatıldı.
İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.
İyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.
Qırım aq qorçalayıcı gruppası, «içtimaiy ağlardaki ekstremizm» ükümleri çıqarılğan qırımlılar davanıñ ğayrıdan baqılmasını talap ete bile, dep bildirgen edi. Rusiye prezidenti Vladimir Putin «Rusiye Ceza kodeksiniñ 282-nci maddesine deñişmeler kirsetilgenine dair» qanunnı imzaladı.
