Qırımdaki Tahqiqat komitetiniñ tahqiqatçısı Timofey Piven Zello internet-ratsiyası vastasınen ekstremist teşviqatını yapqanında qabaatlanğan İsmail Ramazanovğa qarşı davanı areketlerinde cinayet olmağanı içün qapattı.
Bu qararnıñ kopiyasını o, Rusiye kontrolindeki Aqmescit rayon mahkemesiniñ oturışuvında kösterdi, dep bildirdi Qırım.Aqiqat mühbiri.
«Tahqiqatçı Piven mahkemede yanvarniñ 9-nda bergen muracaatımıznı qanaatlendirgenine dair qarar kopiyasını berdi – muracaat şu künü qayd etilgen edi. Lâkin İsmail er kün tahqiqatçığa telefon etip, qararnı soray edi, o, ise qarar daa yoq, dep ayta edi. Qarar keçken künniñ tarihınen çıqarıldı dep tüşünmemiz içün sebep bar», – dep tarif etti «Agora» halqara aq qorçalayıcı gruppasınıñ advokatı Aleksey Ladin.
Şu sebepten mahkeme, Ramazanovğa qarşı Rusiye Ceza kodeksiniñ 282-nci maddesiniñ 1-inci qısmına istinaden açılğan davanı qapatmaq ve Rosfinmonitoringniñ «Terrorist ve ekstremistler cedvelinden» çıqarmaq muracaatınen bağlı qararnı çıqarmağan tahqiqatçılar Timofey Piven ve Dmitriy Kosâkinniñ areketsizliginiñ qanunsız tanılmasına dair şikâyet arizasınıñ baqılmasını yanvarniñ 18-ne qadar qaldırdı.
Kelecek oturışuvda tahqiqatçı qararnı yanvarniñ 9-nda qabul etip, Ramazanov ve imayecisine yollağanına dair delillerni köstermege mecbur.
«Tahqiqatçı davanıñ qapatılması aqqında prokuratura ile kelişkenini tasdıqladı. Yanvarniñ 18-nde bu qararnı, niayet, körermiz, dep tüşünem», – dep tahmin ete Ladin.
İsmail Ramazanov 2018 senesi yanvarniñ 23-nde tutulğan edi, Novıy mir köyündeki evinde tintüv keçirilgen edi. Rusiye Tahqiqat komiteti, onı Zello internet-radiosı vastasınen ekstremizm teşviqatında qabaatladı.
İyülniñ 14-nde İsmail Ramazanov SİZOdan çıqtı, çünki bu cinaiy iş boyunca şeklengenler yarım yıldan ziyade nezaret altında qalmay.
Avgustnıñ 2-nde belli oldı ki, Ramazanovğa qarşı cinaiy iş qoşma tahqiqatqa qaytarıldı.
