Link açıqlığı

Nazarіy Zanoz

Ukrainanıñ şimaliy-şarqiy istilâcı qomşusı ile informatsion cenkini talili ve işğal etilgen Qırımnıñ informatsion meydanlarınıñ telemahsulatı ile tolduruvını közge alsaq, yarımadağa aqiqatnı yalıñız qırımlı-dostlarımız ve internet vastasınen yetkize bilgenimizni añlamaq mümkün. Amma, bu qaynaqlar, Rusiyeniñ küçlü teşviqatı ile raqiplik yapamağanlarını da is etmek mümkün.


Kremlniñ Qırım yarımadasındaki informatsion siyaseti şimdiki vaqıtta Or-Qapusınıñ o bir tarafında, qırımlılarnıñ suvını kesip, Qırım bereketini yoq etmek, yarımadağa aşıqqan turistlerge tren yollarını qapatqan, ukrain mahsulatlarınıñ ketirilüvini sıñırlap, fiyatlarnı kötergen duşmanlar bulunuvı esasında alıp barıla.

Rusiye teşviqatçılarınıñ arzu-hayal etmege imkânlarını köz ögüne alsaq, bu cedvelni ep devam ettire bilemiz. Qısqaca aytacaq olsaq: Qırımda yüz bergen er türlü menfiy ceryanlarnıñ sebepçisi, «Qırımbizimki» olğanınen razı olmağan Ukraina ve «kiyev huntası»dır. Bundan da ğayrı Kreml, bu devletniñ millionlarca vatandaşları içün yekâne kerçek qaynaq olğan internetni de qoluna almağa niyetlendi.

Beklenilmgen ittifaqdaş

Biz Qırımda er şeyni coyğan kibi körüngende, «amması» peyda oldı. İç beklenilmegen ittifaqdaş peyda oldı. Bu Rusiye telekanalları oldı. Gebbels-Kiselöv adına bu teşviqatçı maşinası Qırım Muhtar Cumhuriyetinde yardımcımız oldı.

Nasıl etip, sorarsıñız? Qolaylıqnen. Federal telekanallarınıñ yarımadada Rusiye akimiyeti peyda olğanınen, yarımada nasıl güzelleşkenini tarif etken bir qaç yayınnı baqqan qırımlılar, ayatta olğan deñişmelerni daa teren añlap başlaylar. Misal olaraq, mayıstaki raatlıq künleri Qırım yalıları turistlernen tolu olğanını beyan etken levhanı alayıq. «Mühbirler» boş yalılarnı köstermege utanmayıp, atta keçken seneleri Qırımnıñ yalı boyunı toldurğan ukrain turistler ile levhalarnı qıdırıp tapmağa bile erindiler.

Ve bu kibi esassız hayallarğa, tek yaz mevsimi para qazana bilgen qırımlılarnıñ munasebeti nasıl olur, aceba? Boş yalılarnı körmek içün atta, evlerinden çıqmay bilgenler nasıl davransınlar? Endi, olar bileler, olarda er şey yahşı, er şey azır ve rusiyeli turistler, çetel musafirleri olarnıñ yaz qazançlarını qurtarırlar ve ilâhre, ilâhre, ilâhre.

Rusiye Televideniyesinden sebep, ondan evel oña can yürekten işanğan adamlar teñqidiy şekilde fikir yürütip başlarlar.

Elbette, kreml teşviqatçılarnıñ er sözüni añlata bilgen soyları da peyda olur. Bu adamlar, bütün ömür yañlış tüşüngenlerini tasdiqlağan delillerden öz psihikasını qorçalamağa tırışacaqlar. Ne qadar çoq yañlışsañ, o qadar da, aqiqatnı menimsemege küç ola.

Amma, buña er kes qatlanmaz. Çünki mustaqil Ukrainada yaşap, olar Rusiye sainlerine baqqanda malümatnı teñqidiy noqtai nazarınen qabul etmege alıştılar. Faqat, bu teñqid yalıñız, devlet kanallarınen bağlı edi, şimdi ise, qırımlılar, açıqtan-açıq teşviqatnı alıp barğan Rusiye kanallarına diqqat ayıracaqlar.

Bunen beraber, er seviyede bulunğan, yarımadaki areketlerinen vaziyetni kerginleştirgen, em de baş nazir Medvedev soñuna çıqıp olmağan meseleler ile Qırım memurları da yardım köstereler.

Onıñ içün de, eñ yaqın vaqıtta «Biz ebediyen Rusiye ile» ve «Biz evimizge qayttıq» şiarları, başından «biz evde», soñra «Ukrainağa qaytsa edik» cümlelerge çevirilicektir.

Rusiye akimiyeti Qırımnı işğal etkenine daa çoq kereler yazıqsınacağına oşay. Ve qolaylıqnen ğalebege irişken, ğururlarnıp oturğan Putinniñ tamağında Qırım tıqalıp qalacaqtır.

Nazarіy Zanoz, siyasiy közetici, publitsist

«Fikir» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün
XS
SM
MD
LG