«Qırım platforması» sammiti bitken soñ, Qırım yarımadasınıñ işğalden çıqarılması ile bağlı bütün esas meselelerden ibaret olacaq bir yekün vesiqa qabul etilmeli. Bunı iyünniñ 22-nde Ukraina prezidentiniñ Qırım MC-deki daimiy temsilcisi Anton Körineviç ABD Marşalı Almaniya fondu tarafından tekşil etilgen «Qırım platforması sammiti:Ukraina ve Transatlantik ortaqlar Qırımnıñ arbiyleştirilmesi meselesini nasıl etip al ete bileler?» munaqaşası vaqtında bildirdi.
«Avgustnıñ 23-nde Kyivde keçirilecek sammitniñ Qırımnıñ Rusiye Federatsiyası tarafından muvaqqat işğali ile bağlı bütün esas meselelerni ve problem saalarını birleştirgen bir yekün vesiqa ya da siyasiy beyanname ile yekünlenecegi taqdirde bunıñ pek yahşı bir netice olacağını sayamız», – «Ukrinform» Körineviçniñ aytqanlarından alıntı ketire.
Körineviç, Qırım platformasınıñ Qırımnıñ işğalden azat etilmegence ve reintegratsiyası olmağance toqtamaycaq bir esnas olaraq devamlı faaliyet kösterecigini qayd etti.
Onıñ aytqanına köre, platformanıñ ofisi Kyivde devamlı olaraq 27/7 rejimde yalıñız Qırım meseleleri ile oğraşacaq hadimlernen çalışacaq.
Qırımnı işğalden azat etilüvini ve reintegratsiyasını tezleştirmek içün platforma çerçivesinde «Rusiye istemegen» muayyen leyhalarnı ömürge keçirmek kerek müim. Bu Kyivde Qırımtatar medeniyeti müzeyi, ya da Geniçeskte hastahane ya da universitetniñ açılması ola bile.
Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar «Dom» telekanalınıñ yayınında Ukraina Tış işler nazirligi avgustnıñ 23-nde olacaq «Qırım platformasında» iştirak etecegini tasdıqlağan memleket sayısını aydınlatmağa daa planlaştırmay, dep bildirdi. Onıñ aytqanına köre, bu qarar Rusiye tirengeni içün qabul etildi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Martnıñ 15-nde ise Rusiye Tış işler nazirliginiñ matbuat kâtibi Mariya Zaharova Kyivniñ Qırım işğalini toqtatmaq ıntıluvları qanunsız ola ve Rusiyeniñ eki subyekti olğan Qırım ve Aqyarğa qarşı istilâ telükesi olaraq qabul etile, dep bildirdi.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
