Halqara "Qırım platforması"nıñ 1-nci Parlament sammitiniñ çerçivesinde sentâbrniñ 21-nde Rusiyeniñ nezaretinde olğan Qırım Yuqarı mahkemesi tarafından "gaz borusında diversiyada" qabaatlanıp 17 yıl apis cezasına mahküm etilgen Qırımtatar Milliy Meclisiniñ reisi muavni Nariman Celâl aqqında vesiqalı film taqdim etildi.
"The Voice of Crimea. Nariman Dzhelyal" Nariman Celâl aqqında ikâyet etken vesiqalı film. Film çekişleri Rusiyeniñ Ukrayinağa büyük istilâsına qadar devam etti.
Nariman Celâlnıñ qomşularınıñ, dostlarınıñ, fikirdeşleriniñ ve imayecileriniñ intervyüleri esasında çekilgen bu film işğal etilgen Qırımda siyasiy taqipler aqqında ikâye ete.
Filmniñ taqdim etilüv tedbirinde apis cezasına mahküm etilgen Qırım.Aqiqat frilanseri Vladislav Yesipenkonıñ apayı Yekaterina Yesipenko ve film rejissörı Anna Tsigima iştirak etti.
"Qırımda bir operator tapamadıq, çünki olar anda yoq. Kim ketti, kim saqlandı, kimni artıq alıp kettiler. Bu pek ağır", - dedi Tsigima.
Öz nevbetinde, filmniñ taqdim etilüv tedbirinde Yekaterina Yesipenko "Qırım platforması"nıñ mehanizmleriniñ "ukrain siyasiy mabüsleriniñ rusiye esirliginde azat etilmesine" yardım etecegine ümüt etkenini bildirdi.
"Bugün cenkke, büyük istilâğa baqmadan, halqara "Qırım platforması" sammiti keçirile. Ve men onıñ mehanizmleriniñ ukrain siyasiy mabüsleriniñ rusiye esirliginde azat etilmesine yardım etecegine ümüt etem", - dedi o.
Oktâbrniñ 24-nde Horvatiyada "Qırım platforması"nıñ 1-nci Parlament sammiti öz işini başladı. Sammit eki kün devam etecek. Birinci kün Qırımnıñ işğalden azat etilmesinden soñ reintegratsiyası meselelerine, keçüv adliye ve Rusiyeniñ halqara cinayetleri içün mesüliyetke çekilmesi aqqında munaqaşalarğa bağışlanğa
Avgustnıñ 23-nde bu yıl Rusiyeniñ Ukrayınağa qarşı büyük istilâsından soñ online şekilde «Qırım platformasınıñ» ekinci sammiti keçirildi.
Ukrayina prezidenti Volodımır Zelenskıy «Qırım platforması» sammitini açıp, qırımlılarğa Ukrayina akimiyeti Qırımğa «kesen-kes qaytacaq», dep ayttı.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayinağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
