«Qırım platforması» öz faaliyetini Ukraina bayrağı yarımadağa qaytmağance bitirmeycek, dep qayd etti Ukraina prezidentiniñ Qırım MC-deki daimiy temsilcisi Anton Körineviç.
Bunı o, iyülniñ 6-nda Kyivde «Ukraina 30» bütünukraina forumı vaqtında ayttı.
«Bizim içün esas vazifelerden biri işğalden zat etüv ve reintegratsiya. Şunıñ içün, «Qırım platforması Aqmescit, Aqyar, Yalta, Bağçasaray ve diger şeerlerimiz üzerinde kene Ukraina bayrağı yelpirep başlamağance öz faaliyetini devam etecek. Avgustnıñ 23-nde er şey endi başlana. Bu soñu degil, bu daa endi başı. «Qırım platforması» Qırım Ukraina nezaretine qaymağance bitmeycek», – dedi o.
Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar «Dom»telekanalınıñ yayınında Ukraina Tış işler nazirligi avgustnıñ 23-nde olacaq «Qırım platformasında» iştirak etecegini tasdıqlağan memleket sayısını aydınlatmağa daa planlaştırmay, dep bildirdi. Onıñ aytqanına köre, bu qarar Rusiye tirengeni içün qabul etildi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
