«Qırım uquq qoruyıcı gruppası» «Qırım platforması» tesiss samitiniñ iştirakçilerini Aqmescitte tevqif etilgen qırımtatar faali Nariman Celâlğa nisbeten psihologik tazyıq qullanması ve eki doğmuş ağa-qardaş Aziz ve Asan Ahtemovlarnıñ iskencelerge oğratılması aqqında malümatqa qarşılıq köstermege çağırdı.
Bunıñ aqqında Qırım.Aqiqatqa «Qırım uquq qoruyıcı gruppası»nıñ başı Olga Skrıpnik haber etti.
«Qırım platforması buña qarşılıq köstermeli, iç olmağanda umumiy bir beyanat yayınlamalı ve soñra bu vaziyetni deñiştirmek içün mehanizmlerni qıdırmalı. Çünki Nariman Celâl Qırım platformasında iştirak etkeni ve onı desteklegeni içün zarar kördi. Bu adiy bir taqip degil, bunıñ sebebi Qırım platformasıdır. Belki de vaqtında qarşılıq olmağanı belli bir bürokratik qıyınlıqlar ile bağlıdır. Amma öpertiv qarşılıq müimdir - çünki vaziyet ilerilegenini köremiz. Bir aftadan soñ tutulğanlar iskencelerge oğratılğanı belli oldı», – dedi o.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Advokat Ayder Azamatovnıñ Qırım.Aqiqatqa bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket UseinovveEldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
