Ukraina TİN başı Dmıtro Kuleba, Qırım platforması faaliyetke ketirilgen soñ, Ukraina akimiyetiniñ şikâyetlerden Ukrainanıñ topraq bütünliginiñ ğayrıdan tiklenilmesi içün muayyen areketlerge keçkenini qayd etti.
«Yedi yıldır bir qurban statusıyeda edik. Soñki bir yıl içinde bu statusnı öz elimiznen qurtarıcı statusına deñiştirdik. Bu, siyasetimizniñ esas deñiştirilmesi. Bütün dünyağa bizden toprağamız alınğanı ile bağlı şikâyetlerimiz artıq artta. "Qırım platforması", topraqlarımıznı işğalden azat etüv strategiyasınıñ qabul etilüvi – qurban statusınıñ red etilmesi», – dedi Kuleba.
Nazir, «Ukraina diplomatiyası Ukrainanıñ Tış siyaset strategiyasınıñ ömürge keçirilmesi, telükesizlikniñ temin etilmesi ve Ukrainanıñ inkişafı içün imkânlar yaratmaq içün yañı ittifaqlar ve konfiguratsiyalar qurulması üzerinde çalışmağa devam etecegini ve «Qırım platforması» ise bu işniñ emiyetli bir prioriteti olacağına inandırdı.
«Qırım Platforması sammitiniñ neticelerine köre qabul etilecek beyanname diger devletler tarafından imzalanma içün açıq olacaq. Formatımızğa yañı devletlerniñ celp etilmesi üzerinde çalışacaqmız ve olarnıñ sayısı ep artacaq», – dep qoştı o.
Ukraina TİN Dmıtro Kuleba avgustnıñ 23-nde Kyivde keçirilecek «Qırım platforması» sammiti iştirakçileriniñ tolu cedveliniilân etti.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Avgustnıñ 12-nde Kreml kontrolindeki Qırım Nazirler şurasınıñ reis muavini, Rusiye prezidenti yanındaki Qırım vekili Georgiy Muradov «Qırım platformasınıñ» iştirakçilerini «ağır aqibetler» bekley, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
