"Qırım platforması" halqara sammitiniñ iştirakçileri Rusiyeni tevqif etilgen qırımtatar siyasetçisi ve faali Nariman Celâlnı azat etmege çağırdılar. Bunıñ aqqında "Qırım platforması" iştirakçileriniñ ortaq beyanatında yazıla.
"Biz Rusiye Fedaratsiyasını halqra gumanitar uquq çerçivesinde öz mecburiyetlerine riayet etmege, Qırım ve Rusiye topraqlarında qanunsız olaraq tutulğan ukrayin siyasiy mabüslerini, şu cümleden Qırımtatar Milliy Meclis reisiniñ birinci muavini Nariman Celâlnı deral ve iç bir şart olmadan azat etmege, Halqara adalet mahkemesiniñ 2017 senesi aprelniñ 19 tarihlı qararını yerine ketirip, Qırımtatar Milliy Meclisiniñ faaliyetine qoyulğan yasaqnı lâğu etmege ve regional ve halqara monitoring mehanizmleri içün Qırımğa tam ve maniasız kirip olmasını temin etmege çağıramız", - dep yazıla beyanatta.
Avgustnıñ 23-nde bu yıl Rusiyeniñ Ukrayınağa qarşı büyük istilâsından soñ online şekilde «Qırım platformasınıñ» ekinci sammiti keçirildi.
Ukrayina prezidenti Volodımır Zelenskıy «Qırım platforması» sammitini açıp, qırımlılarğa Ukrayina akimiyeti Qırımğa «kesen-kes qaytacaq», dep ayttı.
Qırımtatar halqınıñ lideri Mustafa Cemilev ğarbiy liderlerni «Putinniñ yüzüni saqlamaq» ıntıluvlarından saqındırdı.
«Qırım platformasında» iştirak etmek içün Kıyivge kelgen Poloniya prezidenti Ancey Duda Rusiye işğal etken Qırımnen beraber Ukrayinanıñ bütün topraqları işğalden azat etilmeli, dep bildirdi.
Qırımnıñ Rusiye yolbaşçısı Sergey Aksönov Telegram kanalında Ukrayina akimiyetini «Qırım platformasını» teşkil etkeni içün tenqit etti.
«Qırım platforması» – Ukrayinanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayinağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
