Qırımtatar halqınıñ lideri Mustafa Cemilev ğarbiy liderlerni «Putinniñ yüzüni saqlamaq» ıntıluvlarından saqındırdı. Bu aqta o, «Qırım platformasınıñ» ekinci sammitinde çıqışta bulunıp ayttı.
«2024 senesi namzetini ABD prezidenti vazifesine köstermege niyetlengen bir amerikalı siyasiy erbapnıñ ve bazı avropalı erbaplarnıñ fikirince, (Ukrayınada – QA) cenkni toqtatmaq, Putinniñ yüzüni coymayıp cenkten çıqması içün Putinge Qırımnı ediye etmeli. Bizim (qırımtatar – QA) halqımız ve ukrayın halqı bunı hayaliy barışıq içün bir çağıruv dep sayalar, Qırımnıñ tamır halqı Putinge qurban etilecek, halqara uquq normalarından vazgeçilecek ve yahşı silâlanğan aydutnıñ qaideleri qabul etilecek. Medeniy dünyada böyle fikirler bir vaqıt ekseriyette olmaycaq, dep ümüt etemiz», – dedi Cemilev.
Ukrayına prezidenti Volodımır Zelenskıy «Qırım platforması» sammitini açıp, qırımlılarğa Ukrayına akimiyeti Qırımğa «kesen-kes qaytacaq», dep ayttı.
«Qırım platformasında» iştirak etmek içün Kyivge kelgen Poloniya prezidenti Ancey Duda Rusiye işğal etken Qırımnen beraber Ukrayınanıñ bütün topraqları işğalden azat etilmeli, dep bildirdi.
Avgustnıñ 23-nde bu yıl Rusiyeniñ Ukrayınağa qarşı büyük istilâsından soñ online keçirilgen «Qırım platformasınıñ» ekinci sammiti başlandı.
Qırımnıñ Rusiye yolbaşçısı Sergey Aksenov Telegram kanalında Ukrayına akimiyetini «Qırım platformasını» teşkil etkeni içün tenqit etti.
«Qırım platforması» – Ukrayınanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayınağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
