Rusiye işğal etken Qırım ve Türkiye arasında yük parom seferleri «ne bugün olacaq, ne de yarın». Bu aqta Rusiye kontrolindeki Qırım naqliyat naziri Sergey Karpov bildirdi.
«Qırım ve Türkiye arasında parom yoq. Ne tünevin bar edi, ne de bugün bar. Yarın da olmaycaq. Tek Türkiyenen degil, diger memleketlernen de muzakereler keçiremiz: parom keçiti, ve diger gemilerni qabul etmek içün er şeyimiz azır», – dedi Karpov TASS Rusiye agentligine.
Memurnıñ aytqanına köre, Qırımda deñiz seferlerinen bağlı tekliflerine azırlar.
«Limanlarnıñ gemilerni qabul etüv imkânları sıñırlı. Amma umumen limanlarımız çalışa, gümruk hızmetleri, liman hızmetleri bar, olar yük ve yolcularnıñ taşımasınen bağlı hızmet yapa bile. Şu sebepten er şeyge olmasa da, seferlerge azırlar», – dedi o.
Noyabrniñ 22-nde Rusiye kütleviy haber vastaları Rusiye kontrolindeki «Cenübiy regional ihrac destegi merkezi» ticaretsiz teşkilâtınıñ müdiri Natalya Serovanıñmalümatına esaslanıp, «Qırım ve Türkiye arasında yük parom seferleri yañıdan başlatıldı», dep bildirdi.
Bu malümatnı içtimaiy ağlardaki saifelerinde Qırımnıñ sabıq Rusiye prokurorı, Devlet dumasınıñ deputatı Natalya Poklonskaya da paylaştı.
Ukrainanıñ Türkiye elçisi Andriy Sıbiğa Qırım ve Türkiye arasında yük parom seferleriniñ yañıdan başlatılmasına dair malümat sahte ola, dep bildirdi.
Qırımtatar Milliy Meclisiniñ reisi Refat Çubarov, Rusiye kütleviy haber vastalarınıñ Qırım ve Türkiye arasında yük parom seferleriniñ yañıdan başlatılmasına dair malümatı sahte ola, dep tahmin etken edi.
«Daa evel bunıñ kibi malümat sahte olıp çıqqan edi. Bu da sahte ola bile. Amma bu tahminge baqmadan, malümatnıñ ne qadar ciddiy olğanını baqacaqmız», – dedi Çubarov Qırım.Aqiqatqa.
Qırım.Aqiqat, Qırım Muhtar Cumhuriyetiniñ Prokuraturası, Ukraina Tış işler nazirligi ve Ukrainanıñ Türkiye elçihanesine izaat bermeleri içün muracaat etti.
2017 senesi oktâbr ayında «Qırım deñiz agentligi» parom ağınıñ operatorı Türkiye ile parom seferlerini yañıdan başlatmağa çare yoq ve böyle meseleler Moskva ve Ankara seviyesinde muzakere etilecek, dep bildirgen edi.
2017 senesi Ukraina Baş prokuraturası, Türkiye, deñiz taşımaları ve liman biznesinen oğraşqan bütün subyektlerge mektüp yolladı, dep bildirgen edi. Mektüpte «Rusiye işğal etken Qırımdan ve onıñ limanlarından kelgen bütün gemiler Türkiyege kirsetilmey, bu regionnıñ limanlarından ketüv izinleri ise berilmey», dep aytılğan edi.
Aqyar ve Türkiyeniñ Zonguldak şeeri arasındaki parom seferleri 2016 senesi oktâbrniñ soñunda teşkil etilgen edi, 2017 senesi mart ayında ise Türkiye tarafı olarnı toqtatmağa qarar aldı.
İşğal etilgen Qırım ve Aqyarnıñ deñiz limanları ve terminallarına çetel bayraqları altında kirüv Ukraina tarafından halqara uquq bozuluvı ve memleketniñ suverenitetini, Ukraina qanunlarını bozğan areketler olaraq tanılmaqta. Böyle areketler sebebinden gemi saipleri, gemi operatorları ve kapitanları cinaiy mesüliyetke çekile bile.
