Link açıqlığı

Saatnıñ esas haberi

Türkiye Tış işler nazirligi Qırım ile yañıdan başlatılğan yük seferlerini sahte malümat dep adlandırdı – Ukraina elçisi


Ukrainanıñ Türkiye elçisi Andriy Sıbiğa
Ukrainanıñ Türkiye elçisi Andriy Sıbiğa

Qırım ve Türkiye arasında yük parom seferleriniñ yañıdan başlatılmasına dair malümat sahte ola. Bu aqta Ukrainanıñ Türkiye elçisi Andriy Sıbiğa noyabrniñ 22-nde Twitterde yazdı.

«Türkiye Tış işler nazirligi elçihaneniñ muracaatına cevap berip, Rusiye propagandasınıñ Keriç-Zonguldak deñiz seferleriniñ yañıdan başlatılmasına dair daa bir sahte malümatını red etti», – dep yazdı diplomat.

Tünevin aqşam Rusiye kütleviy haber vastaları da Qırım ve Türkiye arasında yük parom seferleriniñ yañıdan başlatılmasına dair malümatnı red etti.

Noyabrniñ 22-nde Rusiye kütleviy haber vastaları Rusiye kontrolindeki «Cenübiy regional ihrac destegi merkezi» ticaretsiz teşkilâtınıñ müdiri Natalya Serovanıñ malümatına esaslanıp, «Qırım ve Türkiye arasında yük parom seferleri yañıdan başlatıldı», dep bildirdi.

Bu malümatnı içtimaiy ağlardaki saifelerinde Qırımnıñ sabıq Rusiye prokurorı, Devlet dumasınıñ deputatı Natalya Poklonskaya da paylaştı.

Poklonskayanıñ tasdıqlanmağan malümatı
Poklonskayanıñ tasdıqlanmağan malümatı

Ukraina prezidentiniñ Qırım Muhtar Cumhuriyetindeki vekili Anton Korınevıç, «bizler bu meselenen oğraşıp, malümatnı teşkeremiz», dep ayttı Qırım.Aqiqatqa.

Qırımtatar Milliy Meclisiniñ reisi Refat Çubarov, Rusiye kütleviy haber vastalarınıñ Qırım ve Türkiye arasında yük parom seferleriniñ yañıdan başlatılmasına dair malümatı sahte ola, dep tahmin etken edi.

«Daa evel bunıñ kibi malümat sahte olıp çıqqan edi. Bu da sahte ola bile. Amma bu tahminge baqmadan, malümatnıñ ne qadar ciddiy olğanını baqacaqmız», – dedi Çubarov Qırım.Aqiqatqa.

Qırım.Aqiqat, Qırım Muhtar Cumhuriyetiniñ Prokuraturası, Ukraina Tış işler nazirligi ve Ukrainanıñ Türkiye elçihanesine izaat bermeleri içün muracaat etti.

2017 senesi oktâbr ayında «Qırım deñiz agentligi» parom ağınıñ operatorı Türkiye ile parom seferlerini yañıdan başlatmağa çare yoq ve böyle meseleler Moskva ve Ankara seviyesinde muzakere etilecek, dep bildirgen edi.

2017 senesi Ukraina Baş prokuraturası, Türkiye, deñiz taşımaları ve liman biznesinen oğraşqan bütün subyektlerge mektüp yolladı, dep bildirgen edi. Mektüpte «Rusiye işğal etken Qırımdan ve onıñ limanlarından kelgen bütün gemiler Türkiyege kirsetilmey, bu regionnıñ limanlarından ketüv izinleri ise berilmey», dep aytılğan edi.

Aqyar ve Türkiyeniñ Zonguldak şeeri arasındaki parom seferleri 2016 senesi oktâbrniñ soñunda teşkil etilgen edi, 2017 senesi mart ayında ise Türkiye tarafı olarnı toqtatmağa qarar aldı.

İşğal etilgen Qırım ve Aqyarnıñ deñiz limanları ve terminallarına çetel bayraqları altında kirüv Ukraina tarafından halqara uquq bozuluvı ve memleketniñ suverenitetini, Ukraina qanunlarını bozğan areketler olaraq tanılmaqta. Böyle areketler sebebinden gemi saipleri, gemi operatorları ve kapitanları cinaiy mesüliyetke çekile bile.

XS
SM
MD
LG