Rusiyede 17 yıl apis cezasına mahküm etilgen qırımtatar faali Azat Eyupov Rusiyeniñ Çelâbinsk vilâyetine etap etildi.
Temyiz mahkemesi onıñ sağlıq vaziyetini ve tibbiy diagnozlarını köz ögüne almağan. Bunı "Qırım birdemligi"ne onıñ apayı Gülnara Eyupova haber etti.
Azamat Eyupov, keçirgen bir qaç insulttan soñ ayağı alâ tam olaraq çalışmağanını apayına ayttı.
"Yolda kamera yoldaşları çantalarını taşımağa yardım ettiler. Azamat tayin etilgen yerge barıp çıqqan soñ onı mahsus blokqa karantinge oturttılar. Anda tek bir afta bulundı. Sağlıq alı sebebinden ziyade tutmadılar", - dep ayttı apayı.
SİZO-da tutulğan vaqıt devamında siyasiy mabüs dört miy insulti keçirgen. Hastalıq alâmetleri aqqında ilk sefer keçken sene mayıs ayında onıñ kamera arqadaşı Ruslan Suleymanov haber etti. Tibbiy yardım kösterilmegeni içün Azam Eyupov birisiniñ yardımı olmadan yürip olamay edi.
İyül ayında Rostov-na-Donudaki Cenübiy bölgeniñ arbiy mahkemesi "Qırım musulmanları davası"nıñ mabüsi Azamt Eyupovğa üküm çıqardı ve 17 yıl sert apis cezasına mahküm etti.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
