"Qırım musulmanları davasınıñ" mabüsi Azamat Eyupov sağlıq vaziyeti sebebinden munaqaşalardan red etti ve iyülniñ 18-nde Rostov-na-Donudaki Cenübiy bölgeniñ arbiy mahkemesinde qısqa soñ çıqışını yaptı. "Qırım birdemliginiñ" haber etkeni kibi iyülniñ 19-nda saba saat 9:30 mahkeme üküm çıqaracaq.
Advokat Emil Kurbedinovnıñ sözlerine köre, Eyupovnıñ sağlığı SİZO-da pek zayıflaşqan: "Munaqaşalarğa azırlanmaq içün küçü yetmedi, alâ daa elinde qalem tutmağa qıyın, şunıñ içün soñki söz içün ir nutıq azırladı".
"Qırım birdemliginiñ" haber etkeni kibi, Azamat Eyupovnıñ sağlı alı yaramay olğanını apayı da tasdıqladı.
Azamat Eyupov advokatından deral soñra soñki sozüni ayttı.
"Soñki söz fikrini aytmaq ve suçsuz olğanını köstermek içün soñki fırsattır. Men suçumnı tanımaycağım, çünki menim cinayet davam uydurmadır. Bu menim sesim bile olmağan ses qaydları cedveli ve meni atta tasvir ete bilemegen gizli şaatlar", - dedi o.
Eyupov cinayet davasınıñ sahte ve uydurma olğanına emin olğanını bildirdi.
"Menim terrorcı olğanımnı deyler. FSB-nıñ maqsadı qırımtatar halqımıznı yaramay köstermektir. Basqılarnıñ maqsadı budır. Men suslu degilim. Mahkeme zalında azat etilmemni isteyim", - dedi o.
Mahkeme üküm çıqarmaq içün mesleatlaşuv odasına ketti. Evel prokuror Azamat Eyupov içün 17 yıl sert apis cezasını istegen edi.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
