Qırım Muhtar Cumhuriyetiniñ prokuraturası Rusiye sıñırcılarınıñ noyabrniñ 8-nde Herson vilâyetiniñ memuriy sıñırında qırımtatar milliy areketiniñ veteranı Ayşe Seitmuratovanı tutıp almasını ve yibermegenini Ukraina ve halqara uquqınıñ bozuluvı dep adlandırdı.
Bu aqta prokuraturanıñ matbuat kâtibi Yekaterina Didenko Facebook saifesinde bildirdi.
«İşğalci akimiyet tarafından 82 yaşında Ayşe Seitmuratova, qırımtatar milliy areketi veteranınıñ qanunsız tutuluvı – Ukraina ve halqara qanunlarınıñ daa bir bozuluvıdır. Qırım Muhtar Cumhuriyetiniñ prokuraturası işğalcilerniñ qanunsız faaliyetini taqip etip qıymet kese», – dep yazdı o.
Rusiye quvetçileri Ayşe Seitmuratovanı cuma künü, noyabrniñ 8-nde, memuriy sıñırdan keçkende tutıp aldı. Daa soñra Qırımtatar Milliy Meclisiniñ reisi Refat Çubarov Ayşe Seitmuratova Aqmescitke qayttı, dep bildirdi.
Ayşe Seitmuratova qırımtatar milliy areketiniñ eñ meşur faallerinden biri ola. Onı eki kere apiske alıp mahküm etken ediler.
70-inci yıllarnıñ ortasında yañı apis müddetine oğramamaq içün Seitmuratova ABDne ketmege mecbur edi.
Birleşken Devletlerde Azatlıq Radiosı ve «Voice of America» ile çalışqan, rus, özbek ve azeri tillerinde yayınlar alıp barğan edi.
2001 senesi Ayşe Seitmuratova kimsesiz qalğan qartlar içün Aqmescitte «Qartlar evini» açqan edi, o, bügünge qadar onıñ sermiyasına çalışa.
Milliy areket faaliniñ ayat yolu ve tercimeialı aqqında «Ayşe Seitmuratova. Halqı içün küreş meydanında» maqalesinde oqumañız mümkün.
