Moskva ve Ankara Qırım meselesinde bam-başqa fikirdeler, amma bu eki memleket arasındaki munasebetlerniñ inkişafına keder etmey, dep bildire Rusiye prezidenti Vladimir Putinniñ matbuat kâtibi Dmitriy Peskov.
«Qırım ciddiy zıddiyetler sırasına kire, bu meseledeki fikirlerimiz farqlı. Türkiye zenaatdaşlarımızğa Qırım meselesinde fikirlerimizni yetkizmege devam etecekmiz», – dedi o, dekabrniñ 4-nde jurnalistlerge.
Türkiye Tış işler naziri Mevlüt Çavuşoğlu 27-nci OSCE nazirler şurasında çıqışta bulunıp, Qırımda insan aqları vaziyeti qasevetlendire, dep qayd etti. O, Qırımnı işğalden qurtaruv platforması teşebbüsine qol tuttı.
Türkiye, Ukraina topraq bütünligine er vaqıt qol tuta ve Qırım işğalini takbih ete.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
