Kreml kontrolindeki Qırım Yuqarı mahkemesi Aqmescitniñ Kiyev rayon mahkemesi tarafından 2 biñ ruble para cezasını alğan qırımtatar qadın faali, aq qorçalayıcı Lutfiye Zudiyevanıñ temyiz arizasını red etti. Bu aqta Qırım.Aqiqat mühbiri bildire.
Zudiyeva, Facebookta başqasınıñ paylaşqanları sebebinden açılğan memuriy davanı «aq qorçalayıcı faaliyetine basqı usulı» dep sayğanını mahkemede añlattı.
Qadın faal qararnıñ lâğu etilüvini ve qabaatınıñ delilleri olmağanı ve tahqiqatnıñ qanunsız sebebi olğanı içün dava qapatıluvını rica etken edi.
«Mahkeme davanıñ esas delillerini baqmadı – üçünci şahıslarnıñ üç paylaşuv resmi, meni qayd ettiler ve men qabaatlı oldım. Menim cinayetim olaraq baqılamaz. Amma esası – qadı 15 daqqa devamında qararnı oqudı, azırlanması içün tek 5 daqqa kerek oldı (mesleat odasında bulunğan vaqıt). Bu qarar evelden azırlanıldı ve diger qararnı beklemedik», – dep ayttı oturışuv neticeleri aqqında Zudiyeva.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı. Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
Zudiyevanıñ aytqanına köre, dava malümatlarında qullanıcı Tagir Minibayevniñ 2014 senesi aprel ayında paylaşqan yazısı bar, Zudiyeva anda qayd etile.
Rusiye kontrolindeki Aqmescit Kiyev rayon mahkemesi mayısnıñ 31-nde qırımtatar faali ve aq qorçalayıcısı Lutfiye Zudiyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanındaqabaatlı tanıp, oña 2000 ruble para cezasını berdi.
Aqmescitniñ Kiyev rayon mahkemesi mayısnıñ 31-nde qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 1000 ruble para cezasını berdi.
Ukraina Tış işler naziri Pavlo Klimkin dünya toplulığını mayısnıñ 30-nda ilhaq etilgen Qırımda tutulğan qırımtatar aq qorçalayıcıları Lutfiye Zudiyeva ve Mümine Saliyevanıñ azat etilüvini talap etmesine çağırdı.
Qırım Muhtar Cumhuriyeti ve Aqyar Milliy politsiyasınıñ baş idaresi yarımadada qırımtatar faalleri Lutfiye Zudiyeva ve Mümine Saliyeva tutulğanından cinaiy tahqiqat açtı.
Al-azırda Qırım ve qomşu Rusiyeniñ müessiseleri bir de bir izaat bermediler.
