Kreml nezaretindeki Qırım Yuqarı mahkemesi aprelniñ 19-ında Qurman “Hizb ut-Tahrir davası”nıñ iştirakçisi Rüstem Emiruseinovnıñ tevqif müddetini uzattı. Bu aqta Facebookta “Qırım birdemligi” bildire.
“Mahkeme apellâtsiya şikâyetini red etti. Sıñırlav tedbiri olğanı kibi qala, yani 2019 senesi iyül 13-ünece apishanede tutuluv”, - denile beyanatta.
Aprelniñ 8-inde Qurman rayonınıñ Büyük Onlar (Oktâbrskoye) qasabasında Rustem Emirüseinovnıñ babası Reşat Emirüseinov Rusiye quvetçileriniñ areketlerine qarşı bir kişilik narazılıq aktsiyasına çıqtı.
Fevralniñ 14-nde Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emirüseinov alındı.
Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
