Kezlev şeer hastahanesiniñ infektsion bölüginde iyülniñ 19-nda 55 insan, şu cümleden 50 bala, qala. Olar Kezlev civarındaki «Luçistıy» bala lagerinde olğan kütleviy zeerlenüvden soñ hastahanege yatqızılğan edi.
Bu aqta iyülniñ 19-nda Qırımdaki Rospotrebnadzor matbuat hızmeti haber ete.
Müessiseniñ malümatına köre, «hastahanege alınğanlarnıñ alı bir qarar sayıla». Vaziyet Rospotrebnadzornıñ kontroli altında qala.
Müessiseniñ malümatına köre, mütehassıslarnıñ işi devam ete.
Tataristan gençlik naziri lagerde zarar körgen Qazan balalarını hastahaneden çıqarmağa azırlanalar, dep bildireler.
İyülniñ 16-nda Kezlev civarındaki Yalı Moynaq (Zaozernoye) köyüniñ bala lagerinde kütleviy zeerlenüv oldı. Müessise müdiri kün devamında aman-aman 40 bala alını ekimlerge şikâyet etti, dep tasdıqladı. Daa soñra 49 bala ve 5 büyük zeerlendi, dep haber etildi. Qırımnıñ Rusiye sağlıq nazirliginiñ malümatına köre, 55 insan, şu cümleden beş büyük, hastahanege alındı.
Balalar Qırımğa Qazandan raatlanmağa keldi, yaşları – yediden 17-ge qadar.
Rospotrebnadzor lagerde dezinfektsiya yapılğanını bildirdi. Qırımdaki Rusiye Tahqiqat komiteti balalarnıñ zeerlenüvi sebebinden cinaiy davalar açılğanını aydınlattı. Rusiye kontrolindeki Kezlev prokuraturası «Luçistıy» lagerinde raatlanıp zeerlengen qazanlı balalarnıñ hastahanege alınmasınen bağlı teşkerüvni teşkil etti.
Tataristan gençlik işleri nazirligi Kezlev civarındaki «Luçistıy» lagerinde raatlanğan qazanlı balalarnıñ zeerlenüv sebebi salat ola bile, dep bildirdi.
Daa soñra Rospotrebnadzor infektsiya sebebi aşhane hadimleriniñ gigiyena qaidelerine riayet etmegeni ola bile, dep haber etti.
