"Qırım işğaliniñ künleri sayılı". Ne içün kollaborantlar ukrayin yırlarını yasaq ete

Qırımnıñ Rusiye akimiyeti, ukrayin vatanperver türküleri yañğırağan tedbirlerde iştiraknıñ cezalandırılması ile beraber Ukrayinağa er angi açıq destekniñ kösterilüvine sert cevap berecek. Bunı Qırımnıñ Rusiye yolbaşçısı Sergey Aksönov Telegram kanalında yayınlanğan bir video mesajında bildirdi. Aksönov rusiye tarafdarı bloger Aleksandr Talipovnıñ bir sıra video yayınlağanından soñ memnüniyetsizligini açıq şekilde bildirdi. Video yazılarında qırımlılar toylarını "Çervona kalına" ve "Stefania" yırları ile keçirgenlerini körmek mümkün.

Ukrayin yırları Qırımdaki rusiye akimiyeti içün nasıl telükeler yarata? Bu beyanatlardan soñ Qırımda neler ola? Qırım.Aqiqat jurnalisti Sergey Mokruşin Ukrayina millet vekili, Qırımtatar Milliy Mecisi reisiniñ muavini Ahtem Çiygoz, Qırım.Aqiqat jurnalisti Katerina Nekreçaya ve Qırımtatar resurs merkeziniñ yolbaşçısı, Qırımtatar Milliy Meclisiniñ azası Eskender Bariyev ile laf etti.

Evel, Qırım sakini Rusiye tarafdarı bloger Aleksandr Talipov Telegram kanalında, onıñ malümatına köre, sentâbrniñ 10-nda Bağçasaraydaki «Arpat» restoranında keçirilgen toynıñ videosını paylaştı. Videoda musafirler «Çervona kalına» ukrayin yırı yanğırağanda oynay. Talipov Aqmescitteki diger toynıñ da videosını paylaştı, anda «Eurovisionda» ğalebe qazanğan Kalush Orchestra taqımınıñ Stefania türküsi yanğıray.

Bundan soñ, Qırımnıñ Rusiye yolbaşçısı Sergey Aksönov Qırımda ukrayin yırları, hususan "Çervona kalına" ve Stefania yanğırağan toylayrnıñ iştirakçilerini cinayet mesüliyeti ile tehdit etti.

"Qırımdaki içtimaiy tedbirlerden ukrayin şiarları, milliy türküler ile videolar peyda olıp başladı. Bu kibi tedbirlerniñ teşkilâtçılarını ve iştirakçilerini mesüliyetke celp etmek ve vazifelerinden boşatmaq ve qanunlarğa köre cezalamaq kerek olğanını sayam. Olar kerçek hainlerdir", - dep yazdı Aksönov.

"Bu, olarnıñ kötleri yanğanını köstere. Çünki bütün bu sekiz yıl devamında toylarda (Qırımda – QA) "Çervona ruta" ve diger yırlar yañğıradı", - dey Ahtem Çiygoz.

Misal olaraq, o, yañı yıl gecesi Ukrayina vaqtı ile feyyerverkler uçurtqan ve Ukrayina gimnini yırlağan, şimdi ise Ukrayina yaqın vaqıtta Qırımnı işğalden azat etecegine ümüt etkenlerini gizlemegen qırımlılar aqqında hatırlay.

Çiygoznıñ fikrince, evel yarımadadaki rusiye tarafdarları Rusiyeniñ Qırımda ebediyen olacağını tüşüngenleri içün bu kibi şeylerge sert qarşılıq köstermediler.

"Duşmanlarnıñ açuvlanması Ukrayina Silâlı Quvetleriniñ areketleriniñ neticesidir. Az qalğanını, Qırım işğaliniñ künleri sayılı olğanı bes-belli, - dey millet vekili.

Qırım.Aqiqat jurnalisti Katerina Nekreçaya anonimlik şartı ile aytmağa razılıq bergen bir qaç qırımlı ile mevcut vaziyet aqqında laf etti.

"Yerli sakinler, büyük istilâ başlamazdan evel iç kimse bu sualni bermegenini deyler. Bayram tedbirlerinde ukrayin yırları yañğıray edi, iç kimse bunda problema körmey edi. Avlama ne içün şimdi başladı? Böyle bir fikir bar ki, bu, Ukrayina ordusınıñ cebede muvafaqiyet qazanması ve işğal etilgen topraqlarnı azat etmesi ile bağlı Qırımda Rusiye akimiyetiniñ qorquları ile bağlıdır", - aytıp bere Nekreçaya.

Onıñ sözlerine köre, bundan evel Qırımda diceylerniñ bazı ukrayin yırlarını çalmaqtan red etmesi emsalleri olğan. Sebep, olarğa teşkerüvler ile kelip, tenbilegenleridir.

Jurnalistniñ malümatına köre, "Arpat" restoranında yüz bergen vaqiadan soñ bu toynı teşkil etken bütün kollektiv ile profilaktik subetler keçirilgen ve bir çoqu bunı tazyıq ve qorqutuv kibi añladılar.

"Rusiyege riayetkâr olğan bazı qırımlılar bu kibi yasaqlarnen bağlı qarışıq duyğular is eteler. Olar gaykalar böyle burıp sıqıştırılğanından şok alındalar ve ukrayin yırlarını diñlemege nasıl yasaq etmek mümkün olğanını añlamaylar", - aytıp bere Nekreçaya.

Sentâbrniñ 12-nde yüz bergen qavğadan soñ "Arpat" restoranına nevbetteki toynı keçirmege bermegenler. Bunı Qırımtatar resurs merkeziniñ yolbaşçısı Eskender Bariyev aytıp berdi.

"İşğalci memuriyetniñ temsilcileri ve FSB hadimleri kelip, toy devam etse er kesni alıp ketermiz dediler. Öyle de dediler. Kelin ve kiyevni, aydavcılarnı, restoran saiplerini de sorğuğa çektiler", - dey Bariyev.

Onıñ sözlerine köre, toy saipleri acele diger restoran qıdırıp başlağanlar, amma tapamağanlar.

Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.

Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.

Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.