Kreml kontrolindeki Qırımnıñ sağlıq naziri Aleksandr Ostapenko «Krım.24» akimiyetke qol tutqan Qırım telekanalına bergen intervyüsında Qırım hastahanelerinde koronavirus hastaları içün tahminen 200 boş yer qalğan, dep ayttı.
«Yer sayısı hasta sayısına uyğun, dep tüşünemiz. Cumhuriyette tahminen 200 boş yer bar», – dep bildirdi o.
Bir afta evelsi, noyabrniñ 3-nde, Ostapenko bir ayda Qırımda koronavirus hastaları içün 529 yer azırlanıldı, dep bildirdi.
Keçken künü, qomşu Rusiyeniñ operativ ştab malümatına köre, işğal etilgen Qırımda 15 kişi koronavirustan vefat etti.
Keçken künü Qırımda 141 koronavirus hastası qayd etildi. Qırımnıñ Rusiye Sağlıq nazirliginiñ soñki malümatına köre, epidemiya vaqtında 170 hasta vefat etti, 6813 kişi tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
