İşğal etilgen Qırımda keçken künü 15 insan koronavirustan vefat etti, dep aytıla noyabrniñ 10-nda bu hastalıq statistikasını derc etken Rusiye operativ ştabınıñ malümatında.
Bu malümatqa köre, bir künde memlekette koronavirustan 368 insannıñ vefatı qayd etildi. Qırım malümatı derc etilse, Aqyar ayrı haber etilmey.
Qırımnıñ Rusiye Sağlıq nazirliginiñ saytında koronavirus hastaları ve vefat etkenler aqqında yañı malümat daa yoq.
Keçken künü Qırımda 141 koronavirus hastası qayd etildi. Qırımnıñ Rusiye Sağlıq nazirliginiñ soñki malümatına köre, epidemiya vaqtında 170 hasta vefat etti, 6813 kişi tüzeldi.
Aqyarda, şeerniñ Rusiye akimiyetiniñ soñki malümatına köre, 3190 insan yañı koronavirus yuqunçına oğradı, 2068 kişi tüzeldi, 79 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
