Link açıqlığı

Saatnıñ esas haberi

Qırım dağlarında eki balalı qadınğa yardım ettiler - qurtarıcılar


Körgezmeli süret
Körgezmeli süret

Qırımda Anğara köyünde coyulğan eki balanen qadınğa yardım ettiler, dep bildire Rusiye FVN-niñ Qırım idaresi.

Beyanatqa köre, iyül 11-inde saat 19:00 qadın ve eki bala, Anğara köyünde kezingende, platoğa çıqıp, coyuldılar.

"Qadın ve 7 ve 11 yaşındaki eki bala Çalbaş dağınıñ yanında tapıldı. Turistlerni, maşnaları qalğan Anğara köyüne ketirdiler. Kimseniñ tibbiy yarımğa ihtiyacı yoq edi", - denile beyanatta.

Qurtarıcılarğa köre, yılnıñ başından berli Qırım yarımadanıñ dağ-ormanında umumen 65 qıdıruv ve qurtaruv operatsiyası keçirildi, olarda 108 adamğa yardım etildi, olardan 10-u - balalar.

Bundan evel Melas qasabasında (büyük Yalta) bir aqay qızınen beraber qayağa köterildi, amma andan özleri tüşip olamadı, FVN hadimleri olarnı qurtardı.

İyül 9-ında eki turist Ay Petri dağında Taraqtaş soqağınen kezingende, qaranlıq tüşkeninen yolnı coydılar.

FVN, dağ-ormanlıqqa ketecek turistlerge telükesizlik qaidelerini hatırlata: birinciden, urba ve ayaqqap qolay olmalı, havfsız marşrutlarnı saylamalı, tuman ve qaranlıq vaqtında kezinmemeli, cap ve ayrı turğan taşlardan yürmemeli.

XS
SM
MD
LG