"Qırım birligi" rusiyeli qırımatatar teşkilâtı vekilleriniñ Praga ziyareti içün Ukrainada Çehiya Cumhuriyetiniñ elçisini Ukraina Tış İşler Nazirligine çağırttılar.
Bunı UNN agentligine Ukraina TİN-niñ matbuat kâtibi Katerına Zelenko haber etti.
Onıñ aytqanına köre, Çehiya Cumhuriyetiniñ elçisi Radek Matulağa "keskin narazılıq"nı bildirdiler.
"Ukrainada Çehiya elçisi, bu haber yalan olğanını ve kerçekke uymağanını ayttı", - dep bildirdi matbuat kâtibi.
Zelenko haber etkeni kibi, diplomat, "Qırım birligi"niñ vekilleri Pragadaki resmiy tedbirge davet etilmegenlerini ve Çehiya prezidentinen iç bir alâqaları olmağanını qayd etti.
"Matul efendi, Rusiye Federatsiya tarafından ilhaq etilgen Qırım ve Ukrainanıñ vaqtınca işğal etilgen topraqları aqqında Çehiya Cumhuriyetiniñ fikri deñişmeyceginde qandırdı", - dep qoştı Zelenko.
Bundan evel matbuatta, Çehiya prezidenti Miloş Zeman, Kreml nezaretindeki "Qırım birligi" qırımtatar teşkilâtınıñ vekillerini tantanalı ziyafetke davet etkeni aqqında malümat peyda oldı.
"Qırım birligi"niñ Facebook saifesinde, Pragada tedbirni hayriye leyhalarnıñ reberi Tamila Bezaziyeva ziyaret etkeni yazılğan.
Ukrainanıñ Çeh Cumhuriyeti elçihanesi bu ziyaret sebebinden narazılıq bildirdi.
Qırımtatarlarnıñ milliy lideri Mustafa Cemilevniñ fikirince, Çehiya prezidenti Miloş Zeman yaqında Çehiyada resmiy tedbirni ziyaret etken Rusiye kontrolindeki «Qırım birligi» qırımtatar teşkilâtı ne olğanını bilmey. Cemilev emin ki, bunıñ kibi ziyaretlerni Rusiye FSBsi Qırım ilhaqını qanuniyleştirmek içün teşkil ete.
