«Qırım birdemligi» cemaat birleşmesi jurnalist, faal ve lâqayt qalmağanlarnı 2019 senesi mart ayında Aqmescitteki ekinci «Hizb ut-Tahrir davası» boyunca apiske alınğan qırımtatar faalleriniñ mahkemelerine kelmege davet ete. Bu aqta teşkilâtnıñ Qırım.Aqiqat mühbirine bergen açıq muracaatında aytıla.
«Jeneva şartnamesiniñ cenk vaqtında vatandaş ealisini qoruv 76-ncı maddesi bozulıp, tutulğanlar Rostov-na-Donuğa avuştırılğan edi, anda ise ayrı tahqiqat izolâtorlarına yerleştirildi. 2019 senesi mayısnıñ 13-14-nde Rostov-na-Donu şeeri ve Rostov vilâyetiniñ 5 mahkemesinde 2019 senesi martnıñ 27-nde apiske alınğanlarnıñ sıñırlav müddetini uzatuv oturışuvları olacaq. Keçirilmesi planlaştırılğan mahkeme oturışuvlarına kelip, qanunsız taqip etilgen Ukraina vatandaşları, qırımtatarlar, faaller, Qırımdaki cemaat imayecilerine qoltutmağa davet etemiz», – dep ayta faaller muracaatlarında.
«Qırım birdemligi» qayd etkenine köre, davanıñ 24 mabüsinden 18-i teşkilât faali ola, qabaatlanğan daa bir kişi – Edem Yayaçikovnıñ bulunğan yeri alâ daa belli degil.
Mayısnıñ 13-nde Rostov-na-Donu Lenin rayon mahkemesinde dört oturışuv (saat 14:00-dan başlap) ve Taganrog şeer mahkemesinde dört oturışuv (saat 10:30-dan) keçirilecek. Mayısnıñ 14-nde Şahtinskiy şeer mahkemesinde dört oturışuv (saat 9:00-dan), Oktâbrskiy rayon mahkemesinde üç oturışuv (saat 10:30-dan) ve Rostov-na-Donu Kirov rayon mahkemesinde sekiz oturışuv (saat 9:30-dan) olacaq.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
