AQMESCİT – Ukrayina Qırımnıñ işğalden azat etilmesine ve reintegratsiyasına azırlana. Yönelişlerden biri kadrlar meselesidir. Qırım arbiy memuriyetiniñ yolbaşçısı vazifesine namzetni yarımadanıñ işğalden azat etilmesine qadar saylamaq kerek, dep saya Prezidentniñ Qırım MC daimiy temsildijsi Tamila Taşeva. Qırım.Aqiqat bu mevzuda qırımlı ekspertlerniñ fikrini ögrenme qararına keldi.
Ukrayina prezidentiniñ Qırım MC daimiy temsilcisi Tamila Taşeva, kelecek Qırım memurları içün qoşma oqutuvnıñ keçirilmesiniñ kerekligini qayd ete.
"İş doquz yıl işğal altında olıp da azat etilgen Qırımda olacağını köz ögüne alsaq, kelecek mütehassıslarnıñ beñzegen şaraitte işlemekniñ hususiyetlerini diqqatqa alacaq spetsifik azırlığı olmalıdır", - dedi o.
Onıñ bildirgenine köre, Ukrayina Nazirler kabineti Qırımda akimiyet organlarını ğayrıdan teşkil etmek içün kadrlar yediginiñ yaratılmasını tasdıqlağan.
"Qırımtatar Milily Meclisiniñ iştiragi ile uzun müddetli muzakereler neticesinde Ukrayinanıñ muvaqqat işğal etilgen topraqlarınıñ Reintegratsiyası nazirligi ve Ukrayina Devlet hızmeti meseleleri Milliy agentligi tarafından işğal etilgen topraqlarda devlet organları içün kadrlar yedegi denev leyhası azırlandı", - dep bildirdi Taşeva.
"Almenda" Vatandaş tasili merkeziniñ reisi Valentina Potapova Qırım.Aqiqatqa intervyü berir eken, "Qırımnıñ Ukrayina qanunlarını ömürge keçire bilecek icra akimiyetiniñ olmaması Qırım ile bağlı devlet siyasetiniñ ömürge keçirilmesine pek keder ete edi", dep bildirdi.
Qırımtatar Milliy Meclisiniñ reisiniñ muavini İlmi Ümerov, resmiy olaraq Qırım arbiy memuriyetiniñ yolbaşçısı Ukrayinanıñ diger bölgeleriniñ reberleri kibi aynı şekilde tayin etilmek kerek olğanını añlata. Aynı zamanda siyasetçi, Qırım Qırımtatar mumtariyeti statusını almalıdır, dep saya.
"Bu, Qırımnı ve onıñ hususiyetlerini yahşı bilgen adam olmalıdır. Böyle bir vazifege namzet iç bir alda tatarofob olmamalıdır. 15-20 yıl evelsi Ukrayina Qırımda Qırımtatar muhtariyeti ile bağlı qarar çıqarsa edi, 2014 senesi ne işğal, ne ilhaq olur edi. Qırımtatar halqınıñ statusı ile bağlı qanun ise işğalden azat etilüvni beklemeden qabul etilmelidir. İç bir alda Qırımdaki vaqialarnı aşıqtırmaq mümkün degil. Hususan da bütün seviyelerdeki saylavlarda", - dep saya İlmi Ümerov.
İç bir alda tatarofob olmamalıdırİlmi Ümerov
Milliy Meclis reisiniñ muavini, tayin etilgen memuriyet yarımadanıñ ealisi ile doğru bir şekilde iş qurmaq kerek, dep qayd etti.
"Eali ile doğru bir iş ile ilk saylavlarğa qadar serbestlik şaraitinde Ukrayina degerliklerini bilecek bir nesil yetiştirmek kerek. Qadimiy Romada böyle bir aytıp bar edi: "Qul serbest olamaz, serbest onıñ oğlu ola bilir". Ne qadar hucur körünse de, yaqın kelecekte Qırımda serbestlik filislerini saçacaq akimiyet qurulamaz. Bu tayin etilgen memuriyetler tarafından yapılmalıdır", - dep bildirdi o.
#LiberateCrimea halqara areketiniñ faali, Qırımtatar resurs merkeziniñ eksperti, USQ arbiyi Sergiy Parhomenko, Qırım arbiy memuriyetiniñ yolbaşçısı vazifesine namzet "Qırımda yaşağan Ukrayinanıñ tamır halqları amiliniñ ne olğanını añlamalıdır", dep saya.
"Bu mesele kerçekten doğru ve aktualdir. Qanunlarğa köre arbiy memuriyetniñ yolbaşçısını Prezident tayin ete bile ve bu yarışma keçirilmeden ola. Böyle bir namzet içün belli bir talaplar yoq, olarnı yazıp ayrı bir qanunğa kirsetmek kerektir. Prezidentniñ Qırım MC Temsilciligi bu vazifege iddia etken şahıs angli becereliklerge malik olması mevzusında tevsiyelerde buluna bile", - dep ayttı Sergiy Parhomenko.
Ekspert, "magister programmaları arbiy memuriyet reisiniñ yüksek keyfiyetli apparatnıñ şekillendirüv meselesini al etmez, dep qayd ete.
Doquz yıl devamında Qırımnıñ işğalden azat etilmesinde iştirak etkenlerden biri olmalıdırSergiy Parhomenko
"İnsan eñ azından Qırım sakini, doquz yıl devamında Qırımnıñ işğalden azat etilmesinde iştirak etkenlerden biri olmalıdır. Yani esas köstergiç Qırımnıñ meselelerini añlav ve yarımadanıñ işğalden azat etilmesi işine celp etilüv. Ve böyle bir namzet Ukrayinanıñ tamır qırımtatar halqınıñ temsiliy organı Milliy Meclis ile muzakere etilip tasdıqlanmaq kerek", - dep ayttı ekspert.
Qırımlı faal, "Azat Qırım" cemaat teşkilâtnıñ tesisçisi Oleksiy Yefremov, kadrlarnıñ tayin etilmesinde esas miyar mütehassıslıq olmalıdır, dep saya.
"Yaqınlarda men yarımadanıñ işğalden azat etilmesine bağışlanğan bir Kıyiv forumında iştirak ettim. Anda işğalden azat etilgen Qırımda çalışacaq kadrlar içün esas miyarlar nedir sualine spikerler böyle cevap berdiler: bu tamır halqnıñ temsilcileri, Ukrayina vatanperverleri ve USQ hızmetçileridir. Yani olarnıñ fikrine köre, eñ yahşı variant bütün bu hususiyetlerge malik namzettir. Amma men bu meselede populizm, tazyıq olmağanını ve vazifelerge mütehassıslar, Qırım içün meşur ve nufuzlı şahıslar tayin etilgenini ister edim", - dep bildirdi öz fikrini Yevremov.
Mayısnıñ 18-nde Ukrayina prezidenti Volodımır Zelenskıy Qırım MC ve Aqyar şeeriniñ işğalden azat etilmesi ve reintegratsiyası içün Mesleat şurasınıñ terkibini tasdıqladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
