Rusiye kontrolindeki Qırım akimiyeti tibbiy maska, qolçaq ve diger şahsiy qoruv vastalarını aphaneler tışında satmağa yasaq etti. Hususan, eñ yaqın üç ay devamında olarnıñ satışına tek «Krım-Farmatsiya» müessisesiniñ aphanelerinde izin berildi.
Bu aqta Qırımdaki Roszdravnadzor idaresiniñ yolbaşçısı Vasiliy Klimov aprelniñ 7-nde koronavirus yuqunçınıñ tarqaluvına qarşı operativ ştab toplaşuvında bildirdi.
«Regional operatorlar belgilendi, «Krım-Farmatsiya» olacaq. Maskalar ve qoruv qolçaqları üç ay devamında supermarket ve diger tükânlarda satılmaycaq – tek aphanelerde satılacaq», – dep ayttı Klimov.
Onıñ qayd etkenine köre, qoruv vastalarınıñ fiyatı eñ çoq 10% arttırıla bile.
Qırımnıñ Rusiye Sağlıq nazirliginiñ malümatına köre, aprelniñ 7-nde Qırımda koronavirus sebebinden 2900 insan tibbiy közetüv altında buluna. Qırımnıñ Rusiye yolbaşçısı Sergey Aksenov aprelniñ 7-nde yañı koronavirus hastası aqqında haber etti.
Aqyarnıñ Rusiye akimiyeti, şeerde yañı hastalar yoq, amma 1340 insan yaşağan yerinde közetüv altında buluna, dep bildirdi.
Aprelniñ 6-nda qayd etilgen yañı koronavirus hastası aqqında haber etildi, aman-aman üç biñ insan tibbiy közetüv altında buluna, beş kişi hastahaneden çıqarıldı.
Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.
Qırımda özüni tecrit etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
