Qırımda aprelniñ 7-nde daa bir koronavirus hastası qayd etildi. Hasta Moskvadan kelgen Qırım sakinidir, dep bildirdi Rusiye kontrolindeki Qırım yolbaşçısı Sergey Aksenov.
«O, hastahanege alındı ve keskin nefes virus yuqunçı alâ metlerinen baqıldı. Alâqada olğan insanlarnıñ profilaktikası yapıldı. Böylece, al-azırda cumhuriyette 22 yañı koronavirus hastası bar, 18-i ketirildi, dördü eki qorantadan yerli ola», – dep ayttı Askenov Qırımnıñ koronavirus yuqunçına qarşı tedbirler operativ ştabınıñ toplaşuvında.
Onıñ qayd etkenine köre, yuqunç hastahanelerinden beş kişi çıqarıldı.
«Alâqada olğan ve kelgen şahıslarnıñ profilaktika tedbirleri devam ete. Yaqından alâqada olğan şahıslar yuqunç bölüklerine alındı, uzaqtan alâqada olğanlar – yaşağan yerlerinde tecrit etilip tibbiy közetüv altında buluna. Bu vatandaşlarnıñ laborator tedqiqi yapılmaqta», – dep qoştı Aksenov.
Aprelniñ 6-nda qayd etilgen yañı koronavirus hastası aqqında haber etildi, aman-aman üç biñ insan tibbiy közetüv altında buluna, beş kişi hastahaneden çıqarıldı. Aqyarnıñ Rusiye akimiyeti, aprelniñ 6-na qadar şeerde yañı koronavirus hastaları qayd etilmedi, amma 1800-den çoq insan közetüv altında buluna, dep bildirdi.
Qırımda aprelniñ 3-nden 6-na qadar acele bir şey olmasa, evden çıqmağa yasaq etildi. Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.
Qırımda özüni tecrit etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
