Kreml nezaretindeki Qırım tasil nazirliginde, “Qırım tarihi” 10-uncı sınıf içün Rusiye dersliginden “şübeli saifelerni” alıp taşlacaqlar, dep bildirile.
Bu aqta aprelniñ 6-sında Rusiye haber agentlikleri yazdı.
Bu derslikte, uquq qoruyıcılarnıñ fikrince, “qırımtatar halqına qarşı zıddiyet çıqarğan” fikir-ibareler bar.
“Biz bu saifelerni derslikten alıp taşlaycaqmız. Mayısnıñ soñunace bu işni becererik”, - yaza Qırım tasil naziri Natalya Gonçarovanıñ sözlerinden TASS.
Rusiyeli Qırım tasil nazirliginde, böyle areketlerni, davağa yol bermemek içün yapqanlarını añlattılar.
“Halqlar ara davasını çıqarmamaq içün böyle qararğa keldik. Kollaboratsionizm içün derslik bölügi kitaptan alınacaq. Oquş yılnıñ başına qadar bu iş yapılıp bitirilecek”, - dep bildirdi nazirlik matbuat hızmeti “İnterfaks-Yug” agentligine.
Daa evel Qırımlı adliyeci, sanat ve tasil hadimleri, Qırımnıñ Rusiye tasil nazirligine muracaat etip, 10-uncı sınıflar içün S. V. Yürçenko muarririyetinde çıqqan «Qırım tarihı» dersligini mündericesinde qırımtatarlar aqqında bulunğan provokatsion ibareler sebebinden onı qullanuvdan çıqarmağa rica etti. Kitapta "tatar ealisiniñ ekseriyeti almanlarğa yahşı yanaşqan, çoqusı faal sürette yardım etken edi" dep yazılğan.
Qırım Tasil nazirliginiñ vekilleri adiseni şimdilik izaatlamadı.
